Mingutsitsinerup 30 procentimik annikillisarneqarnissaa siunnersuutigineqarpoq

Nunat tamat isumaqatigiissinnaassappata CO2-mik mingutsitsinerup 30 procentimik, isumaqatigiissinnaanngippatalu 20 procentimik, annikillisinneqarnissaa EU Kommissionimi siunnersuutigineqarpoq.

EU-miit taamatut siunnersuumik oqaasertaliineq USA-mik tatisimaniaanertut isigineqartariaqarpoq. Kiisalu nunanit ineriartortunit siunnersuutip isumaqatigineqarnissaa anguniarneqarpoq, aammami nunat ineriartortut mingutsitsinerminnik annikillisaanissaannut EU annertussusiliinngikkaluarluni aningaasatigut tapeerusulluni nalunaaruteqarmat. Eqqaamaneqartariaqarporli Kommissioni qaffasittumik anguniagassiisarmat, EU-mimi ilaasortat aallartitaat aatsaat marsimi isumaqatigiinniartussaapput. Nunarsuatsinnilu aningaasaqarniarnikkut ajornartorsiortoqarnera pissutigalugu imaariaannaavoq EU-mi ilaasortat minnerusumik mingutsitsinerminnik annikillisaarusuttut, tamanna akikinnerussammat. Mingutsitsinermillu annikillisaaneq akeqartoq nassuerutigalugu, EU-p nunat ineriartortut tapiissuteqarfigissamaarpai. EU Kommissioni siunnersuusioqqaarami tapiissutissat annertussuleraluariarlugit, aningaasaqarnikkut ajornartorsiorneq pissutigalugu EU-mi ilaasortat ingerlaannaaq itigartitseqinammata tapiissutigiumasat annertussusilinngikkallaannarpaat. Avatangiisilli mingutsinneqannginnissaat pillugu suliniaqatigiiffiit, EU-p siunniunnerakkaminik pimoorussinngippallaarneraallutik avoqqaarinninnerannik tamanna aamma kinguneqarpoq. Aningaasaliissutissalli marsimi ataatsimiinnissami annertussusilerneqartariaqassapput.