Mingutsitsinersuaqarnissaa ernummatigineqapoq

Amerikamiut uuliamik qilleriviannit Mexicop Kangerliumanersuaniittumit kivisumit uulia aniasoq unitsinneqanngippat, avatangiisinik mingutsitserujussuarneq periaannaavoq.
Allattoq Elisa Isaksen
apriilip 26-at 2010 08:18

Amerikamiut sinerissamik nakkutilliisuinit taama naliliisoqartoq, nutaarsiassaqartitsivimmi AP-mi allaaserineqarpoq.

Uuliamik qillerivik ikuallattoq naalagaaffiup immikkoortuata Louisianap sineriaata avataaniittoq sisamanngormat kivivoq ippassaanilu uuliamik aniasoqartoq paasineqarluni. Ullormut 160.000 liiteri angullugu uuliaarluertoqartartoq oqaatigineqarpoq.

Amerikamiut sinerissamik nakkutilliisuineersup AP-mut oqaatigaa, matumani eqqugaasut tassaasut kigutilissuit, immap saanilui, niisat aamma raajat assagiarsuillu.

Uuliap aniasup immap qaavaniit 1.525 meterinik itissusilimmiittup unitsinniarnera maanna sulissutigineqaleruttorpoq.

Uuliaarluerneq ippassaq sapaammi 1.550 kvadratkilometerimik annertussuseqartoq, AP-mi allaaserineqarpoq.

Uuliamik qillerivimmi sulisut 115-iusut ikuallattumit annaanneqarput. Aqqanillillu suli maqaasineqarlutik. Taakkuninnga ujaasineq sinerissamik nakkutilliisunit taamaatiinnarneqareerpoq, ajunaarsimanissaat ilimagineqarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq