Mingutsitsinersuaqarnera isertuunneqarsoraat

Immikkut ilisimasallit arlaannaannulluunniit attuumassuteqanngitsut isumaqarput, uulia USA-p sineriaani tissukartoq BP-p oqaatigisaaanit annertunerujussuusoq.

- BP upperisinnaanngilarput. Tassami uuliamik maqisoornerup kinguneri eqqortut toqqorteraat ersarilluinnarpoq, taama oqarpoq Edward Markey USA-mi inatsisartuni nukissiuuteqarnermut avatangiisinullu komitemi pisortaasoq.

Uuliasioqatigiiffissuup aallaqqaammut nalunaarutigaa uulia akuiarneqanngitsoq maqisoq ullormut nappartanik 1.000-inik annertussuseqartoq, kisitsilli taanna aaqqinniarneqapallappoq nappartat 5.000-iunerarneqarlutik.

Immikkut ilisimasallit arlaannaannulluunniit attuumassuteqanngitsut uuliamit annertoorujussuarmit tissukartumeersumit videoliat misissoreerlugit oqaatigaat, uulia maqisoq ullormut nappartanik 70.000-inik annertussuseqartoq, taakkulu assigaat 11 millionit liiterit.

Ingeniøri ilisimatooq Steve Wereley oqarpoq, uulia maqisoq ullormut nappartanik 120.000-inik annertussuseqarsinnaassasoq. Taassumalu kisitsisit BP-p saqqummiussai upperinngilai.

Uulia akuiarneqanngitsoq maanna Louisianap masarsoqarfiinut anngutereerpoq, maannalu masarsuk aamma nuna pukkitsoq immap killinganiittoq kilometerinik arlalinnik annertussusilik mingutsereerlugu.

Floridami sissaq koralillu ikkanninnguuttut aamma uuliamit maanna mingutsinneqariaannaapput.

Uuliamik mingutsitsinermit uumasut assigiinngitsut 600-nit amerlanerusut aamma aarlerinartorsiortinneqarput, taakkununnga ilaallutik timmissat piillikaarsuit, saaniluit imarmiut, kuukkooriarsuit, aarluarsuit tunfiskillu.