Mingutsitsineq killilersimaarniarsaraat

Nunatsinni CO2-mik mingutsitsineq Naalakkersuisut assigiinngitsunik suliniuteqarlutik killilersimaarniarsaraat. Tamanna Inatsisartunut ilaasortap Siumumeersup Anders Olsenip §37 najoqqutaralugu apeqqutaanut, Naalakkersuisunut ilaasortap Jens B. Frederiksenip akissutaani atuarneqarsinnaavoq.
Allattoq Elisa Isaksen
maajip 02-at 2011 05:19

CO2-mik mingutsitsinerup annikillisarnissaa pillugu anguniagaq piviusunngortissinnaajumallugu, apeqqummi pineqartut pillugit naalakkersuisut qanoq iliornialersaarnersut, Anders Olsenip ilaatigut apeqqutigaa.

Jens B. Frederiksenip akissummini erseqqissarpaa, Nunarput ukiuni qulikkaartuni marlussunni uuliamut atuinermut taarsiullugu erngup nukinganik annertusaanermut aningaasaliissuteqartartoq, tassa inuiaqatigiit nalilinnik pilersittagaasa 1 procentiat erngup nukinganik atuinerup annerulersinniarneranut atorneqartarmat.

Tamatuma kinguneranik ullutsinni Nunatsinni nukimmik atuinerup 60 procentiata missaa nukissiuutinit ataavartunit pilersinneqartarpoq. Ilulissani erngup nukinganik nukissiorfik 2013-imi atulerpat tamanna 70 procentinngussaaq.

Tamatumunnga peqatigitillugu sanaartukkanut maleruagassani Nunatsinni illuliornermi oqorsaatinut atorneqartunut sukanganerusumik maleruagassiissutit atuutilersinneqarput. Aamma angallannermi ataavartumik nukimmik atuinerup minnerulernissaa atuilluarnerulernissarlu suliniutigineqartuarput. Jens B. Frederiksenip matumani innersuussutigaa, Air Greenlandip timmisartunik suluusalinnik Dash-8-nik atuilernera, taakkumi Dash-sevenitoqqanut naleqqiullugit ikummatissatigut angisuumik ileqqaaruteqarfiusarmata. Royal Arctic Linemilu umiarsuarni Atlantikukkoortaatini ikummatissaq ileqqaarniarlugu umiarsuit arriinnerusumik ingerlatinneqartalerput.

- Tamanna suliffeqarfissuup aningaasaqarneranut avatangiisitsinnullu iluaqutaavoq, Jens B. Frederiksen allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq