Mingutsitsineq annertuvoq
Ullumikkut aatsaat taama annertutigisumik silaannarmi inuit namminneq pilersitaannik gas-eqarpoq. Tamanna sikuiuitsumi sermimi qillerinermi kingullerni takuneqarsinnaasoq, BBC-mi oqaluttuarineqarpoq. Sermeq ukiunik 800.000-inik pisoqaassusilik ilisimasassarsiortut qilleriffigisimavaat, CO2-millu imaqarnera misissorlugu.
- Sermimi qillikkatsinni paasisat kingulliit uannut eqqissinartoqanngilluinnarput, dr. Eric Wolff oqarpoq.
Inuit pilersitaannik ullumikkut gas-inik aniatitsinerit aatsaat taama annertutigisutut uppernarsaatissaqartutut Eric Wolff-ip qillernerinermi inerniliinerit nalilerpai, pinngortitallu nammineerluni aaqqissinnaanngilai.
- Sermip qillikkap ukiunik 800.000-nik pisoqaassusillip takutippaa CO2-mik aniatitsinerup silaannaap allanngorneranik nassataqartoq. Inuillu pilersitaata pinngortitap nammineq pilersittagaanik qaangiinerujussuaq ernumanartortaqarpoq, Eric Wolff oqarpoq.
Sikuiuitsumi kujallermi sermimi qillerineq 3,2 km-nik isorarttussuseqarpoq, aatsaallu taama isorartutigisumik qillerisoqarluni. Inerniliinerit siulliit 2004-mi saqqummiunneqarput, aatsaalli ilisimasassarsiortut sermip isuata illuatungaa angusimavaat.
