Mingutitsinnginnissaq pingaartippaat

Canadami aluminiumik aatsitsivik Alcoa Sisimiut, Maniitsup Nuullu borgmesteriinit, partiit tamarmik sinniisaannit atorfilittanillu tikeraarfigineqaqqammerpoq.

Alcoap pilersaarutigaa nunatta qeqqani aluminiumik aatitsiviliornissi apeqqullu tamanna marsimi Inatsisartut ataatsimiinneranni oqaluuserineqassaaq.

- Alcoa ukiorpassuani ingerlareersimavoq avatangiisillu mingutsinneqannginnissaanik pingaartitsisorujussuuvoq, taama oqarpoq Søren Lyberth Maniitsup borgmesteria.

Søren Lyberth –ip angalaqataanini iluarisimaarlugu unnersiortoq oqarportaaq nammineq isinik takullugu suna pineqarnersoq takorlooruminarnerulertartoq. Takusatik suli annertunerusumik paasisaqarfigisimanerarpai, Canadami takusartik Islandimiittumik mikinerugaluarluni angeqisoorujussuuvoq.

- Avatangiisimik mingutsitsinnginnissaq Alcoa-kormiut annertuumik pingaartikkaat paasivarput. Aamma nersornaaserneqartarsimapput avatangiisit eriagalugit pisarsimanerat pillugu, Søren Lyberth oqarpoq.

Taamaattumik Alcoa-kormiut nunatsinnut oqariartuutigeqqusimavaat, nunatsinni aluminiumik aatitsiviliussagaluarunik mingutitsinnginnissamik anguniagaqarnissartik pingaartillugu.