Mingutitsinerup kinguneranik toqunartuninneq

Avatangiisit mingutsinneqarnerisa kingunerisaanik Illoqqortoormiuni innuttaasut aavi toqunartoqaratarsinnaammata aaversinnissaat neqeroorutaasimagaluarpoq, tamannali Illoqqortoormiormiunit ornigineqarpallaarsimanngilaq.

Nerisaqarnermut siunnersuisooqatigiinni siulittaasoq Gert Mulvad oqarpoq, tamanna Illoqqortoormiormiunit ilisimaarineqartoq.

- Illoqqortoormiuni innuttaasunit ajornartorsiut tamanna qangali ilisimaarineqarpoq nutaajunngilarmi. Taamaariarmat immaqa innuttaasut aaversinnissartik pisariaqarsorisimanngilaat, Gert Mulvad oqarpoq. Taanna aperineqarpoq, aaversikkumasoqanngitsillugu nakorsat akisussaaqataasarnersut.

- Nakorsaqarfinni sulisut taarseraassinnaasarput, imaassinnaavorlu aaviinissamik neqeroornissaq eqqumaffigivallaarneqanngitsoorsimasoq, oqarpoq.

Gert Mulvad aperaarput, Illoqqortoormiuni inuit aaversinnissaat sooq taamak pingaartiginersoq.

- Inuttut ataasiakkaatut aatsigut toqunartunissimanerluni paasineqarsinnaavoq, amerlanerilli tamanna nalunngereerunnarsivaat, nerisammi aqqutaallutik tamanna pisarmat, Gert Mulvad oqarpoq.

Taanna aperaarput uumasut sorliit toqunartumik akoqarnerpaanersut.

- Uumasut assigiinngitsut nerivallaaraanni toqunartuninnissaq qaninneruleriartussaaq, nannulli orsuanik nerivallaaraanni suli toqunartuninissaq qaninnerulissaaq, akivoq.

Taanna aperaarput kalaallit nerisassaat ilumut peqqinnanngiveqinersut.

- Naamik, kalaalimerngit ataatsimut isigalugit pitsaalluinnartuupput mingutitsinerulliuna kinguneri uani pineqartut. Assersuutigalugu aalisakkat kalaaliminerni minguinnersaapput, tuttut umimmaallu aamma peqqinnarluinnartuupput, uanga nammineerlunga isumakuluuteqanngivillunga kalaalimininngersuuvunga, Gert Mulvad oqarpoq.

Toqunartoqarnerpaat ilaat tassaavoq pinngortitamut ingerlaarsimasoq eqqakkat ikuallanneraniit aallaavilik PCB.

Soorunalumi kalaaliminertortoqarsinnaavoq erseqqissaatigineqarporli assigiinngiiaartunik nerinissaq pingaartuusoq.