Mimip Palle isornartorsiorpaa
Palle Christiansenip apriilip qiteqqunnerani siunnersuutigaa, atuarfimmik aaqqissuussineq allanngortillugu, nunaqarfinni atuartut siusinnerusukkut illoqarfinnut atuariartortinneqartalissasut, tassa 7. klassimit illoqarfinnut atuariartortinneqartalissasut, massakkummi aatsaat 9. klassimiit illoqarfinnut nuuttarmata.
Atuartut illoqarfinni pitsaanerusumik atuartinneqarnissaat, ilinniartitaanermut naalakkersuisup tunngavilersuutigaa.
Taamaassinnaavoq, naalakkersuisup siulia, Mimi Karlsen, maanna Ilinniartitaanermut naalakkersuisuujunnaarluni Ilaqutariinnut, Kulturimut, Ilagiinnut Naligiissitaanermullu naalakkersuisuusoq, oqarpoq.
- Tamatumunngali peqatigitillugu siunnersuutip nunaqarfinni ilaqutariinnut meeqqanullu kingunerisinnaasai ernummatigisorujussuuakka, Mimi Karlsen Atuagagdliutini isumaliutersuummini ilaatigut taama allappoq. Taassuma 12-13-inik ukiullit angerlarsimaffimminnit ilaquttaminnillu nuutsinneqartarnissaanni meeqqat inuunerannut sakkortuumik akuliunnertut taavaa.
- Meeqqat inuttut ilivitsutut ineriartussappata atuarfimmi karakteeriinnaanngitsut aallaavigalugit uttuiffigisariaqarpavut. Meeraaneq kalaallisut matematikkimillu ilinniarnerinnaanngilaq. Aammali ilaqutariinnik pilersitsinerup inuiaqatigiinnullu ilaanerup suunerinik ilinniarfiuvoq, Mimi Karlsen tunngavilersuivoq.
Taanna isumaqarpoq ilinniartitaaneq qaffassarniaraanni, meeqqat pinngitsaalillugit illoqarfinnut nuutsinngikkaluarlugit, angajoqqaat meeqqamik atuartinneqarnerinut soqutiginninnerulernerat aqqutissanut ilaasoq.
Palle Christiansen nalunaarpoq, anguniagarineqartoq tassaasoq siunnersuut Inatsisartut ataatsimiinnissaanni tulliuttuni marlunni Inatsisartunit isummerfigineqassasoq.