Mimi'p aningaasivia matoqqavoq

Aningaasivik ammarneqaqqissanngilaq. KNR qaavatigut aningaasaliiffigineqaqqissanngilaq. Naak Kalaallit Nunaata Radioata aningaasarliornini pissutigalugu tallimanngormat aammaarluni soraarsitsiortortariaqaraluartoq, kultureqanermut naalakkersuisup Mimi Karlsenip tamanna erseqqissarpaa.

KNR-ip sulisui ukiut pingasuinnaat ingerlaneranni sisamararterummik ilanngarput. Ikilisaaneq kingulleq tallimanngormat pivoq, atorfiit aqqanillit sipaarutigineqarlutik.

Tusagassiorfik innuttaasunik sullissinermik suliaqartoq Naalakkersuisut aningaasatigut annaaniannginnamassuk, KNR-mit namminermit, illua tungiliuttut partiivinit sulisullu peqatigiiffiannit, AK-mit, isornartorsiorneqarput. Naalakkersuisulli naakkiginninngillat.

- KNR-imi massakkut toqqarneqarsimasut, tassa aningaasartuutikillisaaanerit aammalu aningaasat tunniuneqartartut sipporniarnagit iliuuseqarnerit, iluarilluinnarpakka, Mimi Karlsen oqarpoq.

Tassalu aningaasanik tunisinissat naaggaarpat?

- Tassa taanna pilersaarutigineqanngilaq, soorlu aamma suliffeqarfiutitsinni allani aamma taamaaliortoqanngitsoq.

Kultureqarnermut politikkimut politikkikkut akisussaasup, Mimi Karlsenip akissutaa taama erseqqitsigaaq.

KNR Namminersorlutik Oqartussanit 62,5 millionit koruuninik ukioq manna aningaasaliiffigineqarpoq.

KNR-illi akiitsuinik, atortunik 2007-imi nutarterinermi pinngortunik, isumakkeerinissamut Mimi Karlsen itigartitsivissunngilaq.

Akiitsut taakkua amigartoortuarnermut peqqutaasunut ilaapput. KNR-imut aningaasaliissutinit ukiumut 2 millionit koruunit ernianut naafferartumillu taarsersuinikkut amingaataalersarput.

- Periarfissanik assigiinngitsunik ujatuiniarta, qanoq ingerlaqqittoqarsinnaanersoq qanorlu ingerlariaqqissanerluta. Periarfissallu tamanna ilagippassuk aamma eqqartorneqarsinaavoq misissorlugulu.

Tassalu taanna ammaffigaat?

- Tassa periarfissat allatuulli misissorneqarsinnaavoq, aamma misissorneqarsinnaavoq, ilumut taamaaliortoqarsinnaanersoq.

Kisianni KNR-imit oqaloqateqarnini qanoq sivisutigissanersoq, Mimi Karlsenip radioavisimut oqaluttuariumanngilaa. Oqaaatigaali,
Naalakkersuisut tusagassiutit pillugit nassuiaammik Inatsisartut ukiakkut atatsimiinneranni saqqummiussissasut. Taassumalu kingunerisussaassavaa, tusagassiutit  pillugit piffissap ingerlanerani politikkeqalerneq.

KNR-mi siulersuisut ulluinnarnilu aqutsisut naapertorlugit sipaarniarnerup kingunerissavaa, radiokkut TV-kkullu 2012-mi aallakaatitat  ikinnerulernerat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat