Tivasarnerup eriagisassanngortinnissaata pisariaqartoq Mimi Karlsen isumaqarpoq.
- Isumaqarpunga pisariaqartorujussuusoq aamma naleqqussinnaasorujussuusoq, Mimi Karlsen oqarpoq.
Tivasarnerup UNESCO-p eriagisassatut allattorsimaffiani ilanngunniarnissaanut sulinermi katersugaasivik suleqatigineqartariaqartoq Mimi Karlsen isumaqarpoq.
- Taama innersuussissagutta suliaq annertooq suliarisariaqarparput. Suliat taamaattut katersugaasivik suleqatigalugu suliarineqartarput. Nalilersuutit pingaartitsinermullu isiginninnerit nalunaarsorneqaqqaartarput, taama suliaq annertusarpoq. Taamaattumik qanoq katersugaasivimmut taanna suliassiissutigisinnaanerlugu misissussavara, Mimi Karlsen oqarpoq.
UNESCO-mi eriagisassatut allattorsimaffimmut ilanngutitsiniaraanni suliassat annertuujupput. Qanorli iliortoqarsinnaanersoq kultureqarnemut naalakkersuisup misissorumavaa:
- Tamanna eqqarsaatigivarput aamma nalunngilarput taama suleriaaseqartoqartartoq. Taamaammat misissoqqaarumavarput oqaloqatiginneqqaarumavugullu, taama pingaartitsinitsinni ilumut tivasarneq tammatsaaliorneqassanersoq.
Siumumiit kultureqarnermut ataatsimiisitaliami ilaasortap Ruth Heilmannip, tivanerup eriagisassanngortinnissaa tapersersorpaa.
- Kulturitta tammatsaaliorneqarnissaa pingaartorujussuuvoq. Kalaallit ikittunnguuvugut, ilisarnaatigulli sakkortuujupput pingaaruteqarlutillu. Qilaatersortarneq nuannarineqartuuvoq, isiginnaarlugu nuannertuuvoq tiguartinnartuullunilu.
Ruth Heilmann isumaqarpoq ilinniarusuttut ilinniarnissaminnut periarfissaqartariaqartut.
- Tivanermut ilisimasallit suli piutillugit isumaqarpunga pingaaruteqartoq ilinniartitsinerup nukittorsarneqarnissaa ilisimasaqartut peqatigalugit, Ruth Heilmann oqarpoq.