Mimi Karlsen uparuarneqarpoq

Naalaganngorniarlutik ilinniarusuttut maanna ilinnialersinneqarneq ajorput, tamannalu ilinniartut ikiligaluttuinnarnerannik peqquteqarpoq. Ilinniartitaanermut naalakkeruisup, Mimi Karlsenip, oqarnera naapertorlugu naalakkanik atorfissaqartitsineq annikillisimammat. Nassuiaalli taanna Peter Frederiksenip akuerinngilaa.

Paamiuni imarsiornermik ilinniarfimmi pitsaassuseqarnermut ataqatigiissaarisoq, kaptajn Peter Frederiksen, oqarpoq naalakkanik atorfissaqartitsineq annikinnerulersimanngitsoq.

Ilinniartitaanermut naalakkersuisoq, Mimi Karlsen, Imarsiornermik ilinniarfiup ilinniartukilliartuinnarnera pillugu §36 tunngavigalugu apeqqummut akissuteqarluni januarip 21-anni ima allappoq:

Issuaaneq aallartippoq: "Tamatumunngali tunngatillugu ilinniartukilliartorneq aalisariutinik nutarterinerup ingerlanneqarsimanera, aalisarnermik inuussutissarsiuteqarnerup pisariillisarneqarsimanera, immakkut assartuinerup pisariillisarneqarsimanerani assigisaanillu tunngaveqartumik naalakkanik pisariaqartitsinerup siusinnerusumut naleqqiullugu annikilliartorsimaneranik peqquteqarsinnaavoq." Issuaaneq naavoq.

- Piviusumut taanna tulluanngilaq, Peter Frederiksen oqarpoq. Aalisariuteqarnerup nutarteriffigineqarneratigut umiarsuit naalagassaannik atorfissaqartitsineq illuatugaangut annertuseriarnerarpaa:

- Taamaappat umiarsuit kusanaqisut ingerlannissaqanngillat, umiarsuillu ingerlannissaqanngippata taava aalisakkanik tunisisoqarnavianngilaq Royal Greenlandilu aningaasanik kaaviaartitassaqassanani. Taamaappallu taava aningaasanut inatsimmi minuseqalissaaq.

Nunatsinni uuliasiortoqalissappat umiarsuit naalagaat suli atorfissaqarnerulertussaapput. Chairn Energy-p assersuutigalugu oqaatigereerpaa Imarsiornermik Ilinniarfimmeersunik naalagassanik sulisoqarnissi soqutigalugu, Peter Frederiksen oqaluttuarpoq:

- Qillerummik nappaaginnartussaanngillat, umiarsuit assigiinngitsut atorfissaqartinneqartussaapput Imarsiornermillu Ilinniarfimmi ilinniartitavut aalisariutaannaanngitsunik ingerlatsisinnaasussaapput.

Inatsisartuni amerlanerussuteqartut Imarsiornermik Ilinniarfiup matuneqarnissaa akuerereeraluarpaat. Aalajangernerli tamanna atorunnaarsinneqarpoq ilinniarfimmi allamut inissinneqaruni ilinniartoqarnerulersinnaaneranik tunngasut misissorneqarallassammata.

Imarsiornermik ilinniarfimmi sulisut taamaalillutik suli atorfeqartinneqarput ukiorli manna atuarfiusoq qaangiuppat sulerissanerlutik naluinnarpaat.

- Ilinniartussanik tiguseqqissinnaanngilagut augustimilu naalaganngornianik ilinniartoqarunnaassalluta. Taamaammat taaneqareersutut misissuisoqassappat 2011-imi aatsaat nutaanik ilinniartoqalersinnaassaagut.

Peter Frederiksen isumaqarpoq Imarsiornermik Ilinniarfik suli Paamiuniiginnassasoq. Illoqarfimmi sammisassaaleqisarneq ilinniartukilliartuinnarnermut peqqutaaqataasinnaanerarpaa.