Mimi Karlsen: Kulturi innuttaasut peqataaffigisariaqarpaat
- Kulturi tassaassaaq ulluinnarni inuit akornanni atortoq aamma atorneqartoq. Taamaammat ullormut tassungaqqissaaq aningaasaliisarneq naleqqukkunnaarpoq, kultureqarnermut, ilinniartittaanermut ilisimatusarnermullu naalakkersuisoq, Mimi Karlsen taama oqarpoq. Kulturimut ullorititaq kulturimik suliaqartut 2007-imi akerliussutsimik takutitseertullu atulersinneqarpoq, ukiullu tamaasa septembarip 28-ani malunnartinneqartassasoq isumaagaluarpoq.
Kisianni kulturip ullua ukuni marluinnarni aningaasaliiffiginerqarpoq.
Naalakkersuisut aningaasanik tapiisarnerat qaangiuppoq, taavalu attanneqarnissaanut aningaasaliersornissaanullu kommunit maanna apeqqutaalerput.
Tassami isiginaartuuinnassangitsugut, aamma ulloq ataasiinnaq kulturimut ulluussanngitsoq, Mimi Karlsen isumaqarpoq.
- Taamatut ullormi ataatsimi kulturisiornermi inuit isiginnaartuinnartut inissisimalertaramik. Taamaaliorneq innuttaasuunik peqataatitsinerunngilaq. Innuttaasut kulturimik ineriartortitseqataanissaat pingaartilluinnarpara, Mimi Karlsem oqarpoq.
Kulturimut ulloqartitsisarnermut 800.000 koruunit atorneqartaraluarput, taakkuali kulturimik allatigut sulinermut nuuneqassapput.
Assersuutigalugu ilinniartitaanermi. Mimi Karlsenip kuturimik atuinermik paasinniittarnini ima nassuiarpaa.
- Soorlu kamiliortarneq inuusuttut akornanni siammateqqissinnaasuugutsigu pitsaasssaqaaq. Inuusuttut kamilisaarnerulerpata ammit atorneqarnerulernissaat anguneqassaaq, Kultureqarnermut, ilinniartittaanermut ilisimatusarnermullu naalakkersuisoq, Mimi Karlsen taama oqarpoq.
Kulturimut ullorittitap atorunnarnissaa sapaatit akunneri marluk qaangiuttut nalunarutigineqarmalli Mimi Karlsen Radioaviisimit apersorniartarsimavarput. tassalu ullumikkut aatsaat iluatsillugu. Mimi Karlsenip utaqqisitsinini ulapaarnrmik peqquteqarnerarpaa.
