Mimi Karlsen: KNR-imik aaqqissuusseqqinniarneq kisermaassiniarpalaarnertut taaneqarsinnaavoq
KNR-ip siulersuisuini ilaasortat tallimanik ilaasortaqalernissaa, Nick Nielsenip siunnersutigaa taakunannga sisamat naalakkersuisunit toqqarneqartartussaallutik.
- Maanna iliuuseriniakkat kisermaassiniarpalaarnertut taaneqarsinaavoq navianartoq. Siulersuisuni tallimani illit aalajangerniarpat, kikkut sisamat tassaniissanersut. Tamanna tusagassiornerup Naalakkersuinikkut akuliuffigineqarneranik oqaatigineqarsinnaavoq, Mimi Karlsen tusagassiuutinut nalunaaruteqarluni allappoq nangillunilu.
- Politikki aqqutigalugu kammalaatinik atorfinitsitsisarnerit inuiaqatigiit akornanni tatiginninnginnermik pilersitsereerpoq, tamannalu unitsittariaqarlunilu, Mimi Karlsen allappoq.
KNR-imi ajornartorsiutit aaqqiiviginiarlugit Naalakkersuisut siulii naammattumik iliuuseqarsimannginnerarlugit, Nick Nielsenip oqarnera Mimi Karlsenip isumaqatiginngilaa.
- Uangut naalakkersuisuunitsinni KNR-ip amigartoorutai, ilaatigut 1 million koruunit 2 million koruunilu akornanni amerlassusillit, KNR-mi siulersuisut qanimut suleqatigalugit pilersaarusiortoqarpoq, aningaasaqarnerlu ilorraap tungaanut aallartillugu, Mimi Karlsen erseqqissaavoq.
Taanna aamma allappoq, KNR-ip imminut pigisunngortinneqarsinnaanera siunertaralugu nalilersuisimallutik.
Nalilersuinerillu taakku, KNR-ip imminut pigisunngortinneqarnissaa siunertaralugu, Nick Nielsenip innersuussutigilluarsinnaagai, Mimi Karlsenip allappoq. Taanna isumaqarpoq, taamaalioraanni tugassiorfik naqisimaneqanngistoq pilersinneqarsinnaammat.
