Mimi Karlsen: Isiginnaartitsineq pillugu inatsit nutaaq takkutingajalerpoq

Aallaqqaammulli Naalakkersuisunngornissi ilimagisimanngilaa.

- Naalakkersuisunngornissannik aperineqarama tigulluaqaara, uangalu suliffigisanni inuuninnilu ingerlatarisimasannut naleqqutitilerlugu akuersaarpunga.

Sulissutissatut pingaarnertut suut aallutissavigit?

- Tamarluinnarmik pingaaruteqarput, pingaartilluguli sulissutigerusuppara inuup pileqqaarnerminiilli ingerlavissaanik aqqutissioqatigiinnissaq, ima paasillugu meeqqerivitsialamminngaaniit atuarfitsialammut, tassanngaaniillu ilinniagaqarnermut periarluni atorfeqarnerup tungaanut ataqatigiissaartumik imaqartumillu, tunngaveqarluartumik aaqqissornissaa qilanaarnarnerpaavoq.

Nunatsinni ilinniarsimasut amerlisarnissaat anguniarlugu qanoq suliniuteqassamaarpit?

- Isumaqanngilanga annertuumik ilinniagaqarniartut kisimik salliutinneqassasut, unali aamma pingaartorujussuuvoq, innuttaasut tamarluinnarmik ilinniagaqarnikkut periarfissinneqassaat, aamma tassani eqqarsaatigineqarpoq ordblindiugaluaruilluunniit, imaluunniit allatut inissisimagaluaruit, taava illit periarfissat atorlugu ilinniagaqarnissannik aqqutissiuussinissaq pingaartorujussuuvoq, taanna aamma anguniagassani pingaarnerpaatut isigineqarpoq, Mimi Karlsen oqarpoq.

Isiginnaartitsinermut inatsiseqalernissaq ukiuni kingullerni oqaluuserineqarpoq, qanoq suliniuteqarfigissaviuk?

- Taanna Inuit Ataqatigiinnit anguniagassatut sallerpaat ilaattut inissinneqarpoq, taannalu suliassanni pingaarnerpaatillugu piffissami qaninnermi suliarisussaavara, Mimi Karlsen naggasiivoq.