Mimi Karlsen: Inissaarutsitsineq uggornarpoq

Ilinniartut ineqarfiisa allaffeqarfiata Kaf-ip ilinniagaqarfiillu suleqatigiinnginnerisa kinguneraat ilinniartut inissaarunnerat. Tamanna Ilinniartitaanermut naalakkersuisup uggoraa.
aggustip 26-at 2010 14:03

Ilinniartulli angerlaannartinneqannginnissaat qulakkeerneqanngitsoq, ilinniartitaanermut naalakkersuisoq Mimi Karlsen oqarpoq.

- Oqaloqateqarninni paasivara assigiinngitsutigut suleqatigiinnginnerit aammalu paatsooqatigiinnerit pissutaallutik taama pisoqarsimasoq, Mimi Karlsen oqarpoq.

Ilinniartulli angerlaannannginnissaat qulakkeerneqanngilaq.

- Taanna qulakkeersinnaanngilara, ataasiakkaammi qanoq suleriaaseqarnersut maannakkut takusinnaanngilara, Mimi Karlsen oqarpoq.

Ilinniartut inissaaruttut ilaat 14-it ulluni qulini Sømandshjemmimiinnerat Perorsaanermik Ilinniarfimmut 130.000 koruuninik naleqarpoq.

- Tamanna uggornartuuvoq, Mimi Karlsen oqarpoq, nangillunilu:

- Tamatta nalunngilarput aningaasat allanut atorsinnaagaluarigut aammalu atorusukkaluaqigigut, taamaammat maannakkut qanimut tamakkua qulakkeerniarlugit iliuusissamik nassaarniarpugut, Mimi Karlsen oqarpoq.

Inunnik isumaginninnermi ikiortinngorniat 14-it Nuummi kollegiassaarunneqartut, taarsiullugu Ilulissani Perorsaanermik Ilinniarfimmut ilinniariartortinneqalertut nalunaarutigineqarpoq.

Ilinniartulli inissaaruttut allat qanoq pissanersut suli nalunaarutigineqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq