Mimi Karlsen: Atuakkiorfik ikiorsinnaanngilarput

Atuakkat nutaanngitsut Atuakkiorfimmit piginneqqaartuuffigineqartut assersuutigalugu naqiteqqinneqassagunik kimit isumagineqarnissaat taamaalilluni qulakkeerneqanngitsoorpoq.

- Ajuusaarutigalugu Atuakkiorfik nalunaarfigaara, Naalakkersuisut nalinginnaasumik atuakkiorneq ingerlatissallugu periarfissaqanngimmata, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Mimi Karlsen oqarpoq.

Atuakkiorfiup qaammatip naanerani matusussap matunnginnermini atuakkat nutaanngitsut allallu atuakkiassatut siunnersuutit allanit isumagineqalernissaat kissaatigisimagaluarpaa.

- Atuakkiat nutaanngitsut arlallit atorneqarnermikkut nungullariartortartut amigaataalersinnaasut ilisimavara, neriuutigaarali saqqummerseqqinnissaannik pisariaqartitsisoqalissappat aaqqiissutissaqartoqarsinnaajumaartoq, Mimi Karlsen oqarpoq.

Erseqqissaatigaa atuakkanik kalaallisuunik saqqummersitsisarneq Naalakkersuisut tapersertuarmassuk, atuakkiortullu peqatigiiffiat suleqatigalugu atuakkiat naqitallu tapersersornissaannut aaqqiissutissanik pitsaasunik nassaarniarnissaq isumagimmassuk.

- Ajoraluartumilli suli meeqqanut inuusuttunullu soqutiginartumik atuakkiat nutaat amigaataapput, taamaattumik atuakkiortut inuillu pitsaasunik isumassarsisartut kaammattuinnarsinnaavakka peqataaqqullugit oqaatsigut atorluarneqaqqullugit meeqqat inuusuttullu atuarusussuseqarnerulernissaat siunertaralugu atuagassanik naammalluartunik qinigassaqartilluartaqqullugit, Mimi Karlsen naggasiivoq.