Meeqqanut Inuusuttunut Ilaqutariinnullu Naalakkersuisoq, Mimi Karlsen (IA).

Mimi Karlsen: Annertuumik innarluutillit imaaliallaannaq nuutsinneqarsinnaasanngillat

Annertuumik innarluutilimmut, septembarip aallartilaarnerani meerartaartumut anaanaasoq oqarpoq, panini Ivaaqqamut uteqqissanngitsoq. Naalakkersuisorli Mimi Karlsen (IA) oqarpoq annertuumik innarluutillit allamut nuutsiinnarneqarsinnaasanngitsut.

Maibritt Lothsen panimmi annertuumik innarluutillip sakkortoorujussuarmik nalaataqartinneqarnerata, tassa naartulersinneqarsimallunilu qitorneriataarnerata kingunerisaanik, annertuumik innarluutillit angerlarsimaffiannut Ivaaqqamut Qaqortumiittumut tatiginnissusaaruppoq.

Taamaammat piumasaqarpoq paninni ingerlaannartumik atuutilersumik Ivaaqqamit allamut nuutsinneqassasoq. Taamatulli piumasaqaraluartoq oqartussaasut arnaq inuusuttunnguaq ulloq unnuarlu angerlarsimaffimmut tassunga utertippaat.

- Oqaluttuuppaannga allamik periarfissaqarsimanngitsoq, taamaammallu ulloq unnuarlu angerlarsimaffimmut tassunga utertittariaqarsimallugu. Aamma oqaluttuuppaannga Ivaaqqami sungaartumut nuutsinneqarsinnaanngitsoq, piareersaqqaartariaqassagaminngooq. Naluara suna piareersaqqaartariaqarsimaneraat, Maibritt Lothsen oqaluttuarpoq nangillunilu:

- Kissaatikka tusaajumaneqanngillat. Sulisut taakkorpiaat aqutsisullu taakkorpiaat paniga sulliseqqittussanngorpaat, arnamut inuusuttumut anaanaasoq Maibritt Lothsen pakatsisimaqisoq kissaammertitaasimaqisorlu, KNR-imut oqaluttuarpoq.

Maibritt Lothsen-ip paasigamiuk panini paarineqarnissaminut ilumut nunatsinni allamik periarfissaqanngitsoq, piumasaqarsimagaluarpoq, Ivaaqqamut utertinneqassappat taava sungaartumut nuutsinneqassasoq. Ivaaqqami sungaartumi najugallit tungujortumi najugalinnut sanilliullugu annertunerusumik ulloq unnuarlu paaqqutarineqarput aammalu nakkutigineqarluarnerullutik. Taamaattorli tassa anaanaasup kissaatigalugulu piumasarisaa aamma iluatsinngilaq.

Meeqqanut, Inuusuttunut Ilaqutariinnullu Naalakkersuisoq Mimi Karlsen Inuit Ataqatigiinneersoq erseqqissaateqarpoq, inunnut ataasiakkaanut sulianullu ataasiakkaanut tunngasunik oqaaseqarsinnaannginnerarluni, taamaattorli aamma erseqqissaavoq annertuumik innarluutillit najugarisaminniit najugaqarfimmut allamut nuutsinneqassappata, tamanna annertuumik piareersaqqaarluni aatsaat pisinnaasoq.

Sulisut immikkut ilinniarsimasuupput

Meeqqanut, Inuusuttunut Ilaqutariinnullu Naalakkersuisoq, Mimi Karlsen (IA) KNR-imut nassuiaavoq annertuumik innarluutillit najugarisaanniit imaaliallaannaq allamut nuutsiinnarneqarsinnaasanngitsut, ilaatigut sulisut najugaqartunut ataasiakkaanut immikkut pisariaqartitsinerat najoqqutaralugu naleqqussakkamik piginnaanngorsartarmata:

- Ajornartorsiut annertoorujussuaq matumani pineqarpoq. Annertoorujussuarmik innarluutillit najugaqarfimmi aalajangersimasumi sivisuumik paaqqutarineqarsimappat, taava aamma sulisui pineqartumut paaqqutarinninnissaminnut pikkorissarlutillu immikkut piginnaanngorsartarput, misilittagaqarfigisarpaat aammalu ukiut ingerlanerini pikkorissarlutillu pineqartumut qanoq pitsaanerpaamik paarsisinnaanissartik naleqqussarfigisarpaat. Taamaattumik najugaqartoq ataaseq allamut nuussappat, taava aamma sulisui taakkorpiaat nooqataasariaqassapput, Meeqqanut, Inuusuttunut Ilaqutariinnullu Naalakkersuisoq Mimi Karlsen (IA) KNR-imut nassuiaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl