Mimi Karlsen: Alloriarneq annertooq
Ullup siulliit assortuuttoqarlunilu isumaqatigiinngittoqartareersoq, Inatsisartuni ullumi eqqissisimanersuaq akaareqatiinnerlu malunnaqaaq.
Inatsisartuni ilaasortat isumaqatigeeruttoramik, Siumup siulittaasuata Aleqa Hammondip 45-nik ukioqalerluni inuuissiornerani erinarsorlutik aallartipput.
Naallu isiginnaartitsisarfeqarneq pillugu inatsit oqaluuserineqaraluartoq, inussiarnisaarneq isiginnaartitsinerorpassinngilaq.
Tassami isiginnaartitsisarfeqarneq pillugu inatsit, Silamiut Nunatsinni tamarmi isiginnaartitsisarfiulernissaanik aammalu isiginnaartitsartutut ilinniatoqarsinnaalerneranik kinguneqartussaq, partiit tamarmik pitsaasutut isigaat.
Inatsisissaq siullermeerlugu ullumi suliarineqarmat tamanna paasinarsivoq, tassalu inatsit akuersissutineqapajaartutut oqaatigineqarsinnaalereerpoq.
- Isiginnaartitsisarnermut inatsisiliornissaq pingaarluinnartuuvoq, alloriarnerlu annertuujuvoq, Kultureqarnermut Naalakkersuisoq Mimi Karlsen oqarpoq.
Tassalu naak allarpassuartigut isumaqatigiinnginneq ersertaraluattoq, kulturimut politikki ataatsimoorfiummat nuannaaqqaaq:
- Tassani ersiutaavoq, kulturimut tunngasut inuiaqatigiinni ataatsimoorunneqartartut.
Aamma Siumup kultureqarnermut tunngasunik oqaaseqartartua, Doris Jakobsen, nuannaaqaaq.
- Partiit tamarmik isumaqatigiinnerisa takutippaat, assortuussutissaqarata inatsit akuersaaripput, tamannalu pitsaasutut takussutissaaginnarpoq.
Tassalu ataatsimiinnermi uani Siumut Inuit Ataqatigiillu aatsaat iluamik isumaqatigiipput. Tassami Inuit Ataqatigiit kultureqarnermut tunngasunik oqaaseqartartuat Juliane Henningsen ima oqarpoq:
- Politikerit ataatsimoorfigivaat, isiginnaartitsisartoqarneq Nunatsinni anersaakkut nukittorsarnissatsinnut iluaqutaasoq, aammalu suleqataasut qujaffigineqarlutik. Aammalu nuanneqaaq, ataatsiomoorluta isummernerigatsigu.
Mimi Karlsen ilanngullugu erseqqissarpaa, Silamiut Nunatta tamakkerluni isiginnaartitisartorilissammatigit.
- Aningaasanut inatsimmi ilaasussanngorput, tassalu aningaasaqarnissartik ulluinnarni suliarinagu, suliariniagartik, inuiaqatigiinni isiginnaartitsineq, suliarisinnaanngorpaat, Mimi Karlsen oqarpoq.
