Mimi angalanerillu
Nissuminilli napisoornera Nunatsinni angalaneranik kipititsigallarpoq. Nissumimmi napisoorsimalluni Nunatsinni angalanissaq ajornakusoortupilussuuvoq.
-Aasap ingerlanerani ajoraluartumik unikaallattariaqarsimavunga angalarpiarsinnaajunnaarama, ingammik timmisartorniarneq ajornakusoorsimavoq. Taamaammat isorliunerusunut, Qaanaamut Tunumullu angalanerit unitsittariaqarsimavagut, taakkumi aasaanerani tikissallugit ajornannginnerusarmata. Assut ajuusaarnarpoq, imaatigulli tikinneqarsinnaasut tikippakka, Mimi Karlsen oqarpoq.
Nunatsinni sumiiffiit amerlasuut umiatsiat atorlugit tikinneqarsinnaapput, Mimi Karlsenillu timmisartorani taakku tikissinnaasimavai.
-Ilaatigut Qullissat inuerutsitaanerisa ukiunik 40-nngortorsiorneqarnerinut atatillugu peqataavunga. Taamaalillunga innuttaasut ilarpassuinik, sinerissap ilarujussuaneersunik, oqaloqateqarnissannut periarfissaqarlunga, Mimi Karlsen oqaluttuarpoq.
