Miluumasut immap iluani naamaniartarput
Eqalussuit nerisassamik aasunnitsumik naamasinnaanerat ilisimaneqareerpoq. Maannali Amerikamiup ilisimatuup Ken Cataniap paasisimavaa miluumasut aammattaaq immap iluani nerisassarsiornerminni naamasinnaanertik atortaraat, nutaarsiassaqartitsivimmi AP-mi taama allaaserinnittoqarpoq. Manna tikillugu ilisimatusarnikkut isumaqatigiissutaagaluarpoq miluumasut immap iluani naamasaqarsinnaanngitsut.
Taama isumaqarneq Ken Cataniap misissuinermigut allanngortinniarunarpaa.
Amerikamiup ilisimatuup taassuma immap iluani filmiliornermigut paasisimavaa uumasunnguaq avinngat ilaat imarmiu supisilluni puaasaliortartoq kingusinnerusukkut siggumminik najuussortakkaminik.
Ken Cataniap pasitsaakkamiuk uumasup puaasaliani naamaniarnermut atortarai, avinngap ilaata imarmiup taassuma nerisartagaasa tikkinik ilioraasimavoq.
Avinngap imarmiup tipi malinnaavigilluarsinnaasimavaa puaasaliorfigeriarlugu najuussortarlugu.
Ken Cataniap paasisaata kinguneranik miluumasut imarmiut allat, soorlu puisit pamiortuullu nerisassarsiornerminni naamasinnaanertik atortarneraat apeqquserneqarpoq.
