Milosivicip timaa misissorneqassaaq

marsip 12-at 2006 16:51

Jugoslaviaasimasumi præsidentiusimasoq Slobodan Milosivic Haagimi eqqartuussiviup sorsunnermi pinerluuteqarsimasunut parnaarussivianiitilluni ippassaq toquvoq. Serbiemi aviisit arlallit Milosivic Haagimi eqqartuussivimmit toqunneqarsimanerarlugu ullumi allaaserisaqarput.

Milosivic parnaarussivimmi inigisamini toqungasoq ippassaq ullaakkut siumorneqarpoq. Milosivicip qatanngutaata uillarneratalu Milosivicip toquneranut Haagimi eqqartussivik akisussaatippaat.

- Qaammatit pingasut matuma siornagut uummallunnini pissutigalugu Moskvamut suliaritikkiartorusukkaluarpoq, itigartineqarlunili, taamaattumik toquneranut eqqartuussivik akisussaasuuvoq, Milosivicip qatanngutaa oqarpoq.

Milosivicip timaata Moskvami misissorneqarnissaanik piumasaqarnermut Haagimi eqqartussivik ullumi itigartitsivoq, Milosovicilli timaanik toqusunik misissuisartut Beogradimi sakkutooqarfimmeersut misissuisinneqarnissaannut akuersilluni.