Milosevic Serbiami ilisaanissaa kissaatigineqanngilaq

Serbiami oqartussat præsidentiusimasup Slobodan Milosevic-ip, nunamini ilisaanissaa kissaatiginngilaat, ernera Marko Milosevic, ataatami timaa aallugu Haag-imut aallannginnermini, nutaarsiassaqartitsivinnut oqarpoq.

-Pisortatigoortumik pisortatiguunngitsumillu siorasaarpaatigut, allatullu iliorsinnaanngilagut Moskva-mi utaqqiisaasumik ilisaanissaanik qinnuteqassalluta. Nalunngilaralu Moskvap borgmesteriata Ruslandip illoqarfiisa pingaarnersaanni ilisaanissaanik akuersaarsimasoq, Marko Milosevic oqarpoq.

Neriuutigineqarsimagaluarpoq Milosevic-ip uillarnerata Mira Markovic-ip parnaarussaanissaanik peqqusissut Serbiami illoqarfiit pingaarnersaanni Beogradimi eqqartuussivimmit atorunnaarsinneqassasoq, taamaalilluni præsidentiusimasup Serbiami ilisaanissaa anguniarneqaraluarluni.

Serbiamili naalakkersuisut Milosevic-ip uillarnera nunamut tutigaluarpat parnaarussaanissaa suli atuutsippaat, Milosevic-illu ataqqinartutut ilisaanissaa aamma kissaatigineqanngilluinnarluni.

Milosevic arfininngormat parnaarussivimmini toqungasoq nassaarineqarpoq, sulilu paaseqqissaarneqanngilaq sooq uummamminik unittoorsimanersoq.