Jugoslaviaasimasumi præsidentiusimasoq Slobodan Milosevic Moskva-mi uummatiminik suliaritinnissani anguniaraluarlugu piaaraluni kukkusumik iisartagartorsimanissaa ilimagineqarpoq, hollandimiu toqunartunik ilisimatooq Donald Uges franskit nutaarsiassaqartitsiviannut AFP-mut oqarpoq.
-Ilimagilluinnaqqissaarpara nammineq nakorsaatitorsimanissaa, Milosevic-immi Moskva-liaanneqarnissani kissaatigaa, Uges oqarpoq.
Milosevic Haagimi parnaarussivimmini toqungasoq arfininngormat nassaarineqarpoq, Nunat assigiinngitsut akornanni sorsunnermi pinerluuteqarsimasut eqqartuussivianni pinerluutigisimasai pillugit eqqartuunneqarnera ingerlaleruttortoq.