Milosevic-ip toqunera misissorneqalerpoq
Slobodan Milosovic tassanngaannaq uummalliulerluni paarnaarussivimmi toqqutseqarsimasoq Naalagaaffiit Peqatigiit Haagimi sorsunnermi pinerluuteqarsimasut eqqartuussiavianit aalajangersarneqarpoq. Qanorpiarli toqusimanersoq suli paasineqanngilaq, nammineq uummallunnini toqqutigineraa, toqunartutortinneqarsimanersoq imaluunniit nammineq toqunartutorsimanersoq ilisimaneqarani.
Hollandimi toqusut timaannik misissuisartut ippassaq nalunaaquttap akunneri arfineq-pingasut Milosovicip timaa misissoramikku paasivaat uummammigut marlunnik ajoquteqarluni toqusimasoq.
Milosovicimik illersuisut siusinnerusukkut Milosovic toqunartutortinneqarsimasoq oqarmata Serbiamiut toqusunik misissuisartut misissuinermi peqataatinneqarput. Taakku Serbiamilu naalakkersuisut nalunaarput misissuineq ajunngilluinnartumik ingerlanneqarsimasoq.
Milosovicip toqqutigisimasaa itinerusumik paasilluarusullugu aaversinnerisa misissorneqarneri aqaguagu aatsaat nammasissapput Milosovic, tassani toqunartutorsimanersoq takuneqarsinnaassalluni.
Milosovicip ilaqutaasa Milosovicip toqunartortinneqarsimanissaa annilaangatigaat. Inuttaatamigooq nammineerluni tamanna annilaanngatigalugu oqartarsimammat. Tamanna aamma Milosovicip nammineq Ruslandip nunanut allanut ministereqarfianut allakkatigut oqaluttuarisimavaa. Milosovicip nammineq nakorsiaraangami allattaaviit takugamigit paasisimanerarsimavaa sakialluummut pupinnermullu akiuussutissartalinnik nakorsaasersugaasimalluni. Tamanna paasiuminaatsissimavaa taamanikkummi nammineq nualluni nakorsiarsimagami.
Pasitsaqqaneq Hollandimi toqunartunik immikkut ilisimatusarsimasup sapaatillu akunneri arlallit matuma siornatigut Milosovicip aavata qaffasippallaaneranik misissuisimasoq Hollandimi nutaarsiassaqartitsivinnut ullaap tungaa oqaluttuarpoq Milosovicip nammineq piaaraluni nakorsaatissarinngisaminik iijoraasarsimasoq Ruslandimukarluni nakorsanit misissorneqarnissi anguniarlugu.
