Milliuunit Ilimanamut tunniuneqartut

Qaasuitsup Kommunia 2,5 million koruuninik, Ilimanami atorneqartussatut aalajangiiffigineqareersimasunik, tunineqarpoq. Aningaasat Namminersorlutik Oqartussat nunaqarfinni isorliunerusunilu angallannermut kusassaanermullu aningaasaliissutaanneersuupput.
februaarip 26-at 2014 06:13

Aningaasat, Namminersorlutik Oqartussat, Nunatsinni kommuuninut sisamanut aningaasaliissutigisimasaannit 10 million koruunininngaannersut, Qaasuitsup Kommuniani borgmesterip tullersortaanit, Jess Svanemit, borgmesteriunermilu nalaani Ilimanami suliniummut isumaqatigiissummi atsiortuusumit, tigulluarneqarput:

- Namminersorlutik Oqartussat taamatut tunniussinerat ima paasineqartariaqarpoq Qaasuitsup Kommunia allanik suleqateqarluni taamatut inerisaaniarnermut tapersersuinera qaavatigut aamma tapersersoraa. Inoqarfiit minnerusut soorunami arlaatigut nikeriarsinnaanissaanik siunertaqarmat,

Jess Svane, Qaasuitsup Kommuniani borgmesterip tullersortaa oqarpoq.

Aningaasallu kommuunip Ilimanami suliniummi aningaasanut atugassanut kontoliarisimasaanut maanna ikineqarput:

- Tassa 2,5 millionit pitoreerlugit Namminersorlutik Oqartussat tunniukkusuppaat Ilimanamut. Aamma aningaasat piorsaanerinnarmut tunngannginnamik. Kisianni aamma aningaasat suliffissaqartitsiniarnermut atugassatut siunnerfigineqarnikuummata, Jess Svane oqarpoq.

Kommuunip Ilimanami suliniummut aningaasartuutissai tamakkiisut allaffissornikkut maanna naatsorneqaleruttorput, kommunalbestyrelsimullu marsip 26-ani saqqummiunneqassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq