Millioninik akiligassinneqanngillat

Suliffeqarfik BJ Entreprise annerpaamik akiliisussanngortinneqarpoq, 670.000-it koruuninik akiliisussanngortinneqarami. Kang-Total-Byg 480.000-it koruuninik, Permagreen Grønlandilu 415.000-it koruuninik akiliisussanngortinneqarput.

Suliffeqarfiit taakkua pingasut pisortaat tamarmik immikkut 25.000-it koruuninik taassuma saniatigut akiliisussanngortinneqarput.

Eqqartuussinermi aalajangiineq saqqummiunneqarmat eqqartuunneqartut eqqartuussivimmi najuutinngillat, Permagreen Grøndlandilli eqqartuussissuserisua eqqartuussivimmi najuulluni.

Suliaq Naalagaaffiup Aningaasatigut Pinerluuteqartarneq pillugu eqqartuussissuserisuanit ingerlanneqarpoq, naallu suliffeqarfiit pineqartut 1,7 aamma 3,9 millionit koruunit akornanni akiliisussanngortinneqarnissaat unnerluussisussaatitaasut piumasarigaluaraat, ullumikkut aalajangiineq iluaraat:

- Aalajangiineq sukumiinerusumik maanna atuassavara, aalajangiinermilu suut tunngaviginiarneqarsimanersut paasiniassallugu. Inatsimmilli annertuumik unioqqutitsisoqarsimaneranik eqqartuussiviup unnerluussisussaatitaasut isumaqatigigai nuannaarutigaara. Inatsimmik taamatut unioqqutitsisoqarsimanera inuiaqatigiinnut Nunattalu unammilleqatigiissinnaassusianik innarliisoq Eqqartuussiviup oqariartuutigaa, tamannalu nuannaarutissaavoq. Annikinnerusumilli akiliisitaasunngortitsisoqarneranut tunngaviusut sukumiinerusumik maanna paasiniassavarput, Helle Olesen, unnerluussisussaatitaasut sinnerlugit taama oqarpoq.

Kalaallit Nunaanni Eqqartussivik unnerluussisussaatitaasut isumaqatigalugit isumaqarpoq, suliffeqarfiit pineqartut pisortatigoortumik suliariumannittussaarsiuussisoqarnissaq sioqqullugu Sisimiuni 2008-2009-mi sisamariarlutik annertuumik inatsisinillu unioqqutitsisumik neqeroorutissaminnik tulluarsaasarsimasut.

Suliaq Nunatta Eqqartuussivianut suliareqqitassanngortinneqassanersoq Unnerluussisussaatitaasut Naalagaffiup Aningaasatigut Pinerluuteqartarneq pillugu Eqqartuussissuserisua suleqatigalugu ullut 14-it qaangiutsinnagit aalajangernaqassaaq.

Sanaartornerup iluani Kalaallit Nunaanni pissutsit atuuttut Eqqartuussiviup aalajangiinermini tunngaviginiarsimavai, assersuutigalugu Danmarkimut naleqqiullugu annikinnerunera tunngaviginiarneqarsimaluni.

Permagreen Grønland suliami matumani kisiartaalluni pinngitsuunerarpoq, Kang-Total-Bygillu Eqqartuussiviup aalajangiineranut atatillugu qisuariaatini ullup ingerlanerani saqqummiutissamaarpai.
Eqqartuussiviup aalajangiinera Radioaviisimi sukumiinerusumik unnugu tusagassaqarumaarpoq.