Millionilinnik amigartooraluarlutik ernumanngillat

Aatsitassat qaqutigoortut, aligoqqiit, kanngussak, kuulti wolframillu pillugit piaalersinnaanissamut ukiuni kingullerni suliniuteqarnini, aatsitassarsiortitseqatigiiffiup NunaMineralsip attappaa. 34 millioner koruunini amigaartooraluarlutik ernumaammersimanngillat.
Allattoq Mads Lynge
apriilip 02-at 2012 06:13

Aatsitassarsiortitseqatigiiffik NunaMinerals 33,4 millionit koruuninik siorna 2011-mi amigartooruteqartoq ingerlatseqatigiiffiup naatsorsuutaani takuneqarsinnaavoq.

Naak amigartooruteqaraluarluni NunMinerals aarlerinngilaq. Aatsitassarsiorluni misissuinerit amerlanerat eqqarsaatigalugu amigartooruteqarnissartik, NunaMineralsip naatsorsuutigereersimavaa.

NunaMineralsip piginneqataassutinik aktianik atulersitsinermigut 20 millionit koruunit siorna isertitsissutigai, namminerlu aningaasaatai 137 millionit koruuniullutik.

Piginneqataassutsit aqqutigalugit aningaasanik ukioq manna pilersorneqarsinnaanissani aatsitassarsiortitseqatigiiffiup pilersaarutigaa, ukiarulu tamanna naammassineqassangatinneqarluni.

Aatsitassarsiorsinnaanissamut akuersissutit aqqutigalugit nuna 10.000 kvadratkilometerit missaannik annertutigisoq NunaMineralsip oqartussaaffeqarfigaa.
Nunamik misissuiffigisamik tamakkiisumik ilaannakortumilluunniit piginninnikkut aatsitassarsiornissaq siunniunneqarpoq.

Aatsitassat soqutiginaateqarsinnaasut annertussusaat paasiniarlugu misissuisoqaleruttorpoq. Avatangiisit mianeralugit aatsitassarsiorsinnaanissaq siunertaavoq, imminullu akilersinnaasumik aatsitassarsiortoqarsinnaanersoq aamma misissuiffigineqarluni.

Nammineq, allanilluunniit suleqateqarnikkut, aatsitassarsiornerup iluani ineriartortitsinissaq aamma anguniarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq