Millionilikkaanik ajunngitsorsiassaqartitsinini Royal Greenlandip isertuussinnaanngilaa

Royal Greenlandimi millionilikkaanik ajunngitsorsiamik avammut tusarliunneqarsimanerat tunuartup aappaata narrassimaarutigaa, suliffeqarfissuarmili siulersuisunut siulittaasup tamanna annerusumik paaserusunngilaa.
januaarip 28-at 2011 17:39

Flemming Knudsen, aamma pisortap tullia, Pâviâraq Heilmann tunuarnerminnut atatillugu 14,5 millioni koruuninik ajunngitsorsiassaqartinneqarput. Tamatumalu avammut tusarliunneqarsimanera, Pâviâraq Heilmannip assut naammagittaalliuutigaa

Pisoq Qanoruumi ulluni kingullerni sammineqarpoq, Pâviâraq Heilmannilu Qanoruumut mailikkut ilaatigut ima allappoq:

- Suliunnaarnermi ajunngitsorsiassat pillugit tusagassiuutinut nalunaartoqarniartoq piginnittuniit siulersuisuniilluunniit ilisimatinneqanngilanga.

Allakkani Pâviâraq Heilmannip Radioaviisimut ullumi itisilerusunngilai.

Pâviâraq Heilmannip narrassimaarnera Royal Greenlandimi siulersuisut siulittaasuata, Niels de Coninck-Smithip, paasisinnaavaa, isumaqarlunili Heilmannitut atorfeqaraanni taama pisoqarnissaanut pireersimasariaqartoq:

- Isumaqatigiissutaassimasup tusarliunneqarnera iluarinngimmagu paasisinnaalluarpara. Oqaannarsinnaavungali pisoq eqqartoratsigu isertuunneqarsinnaanngitsoq misigigatta. Suliffeqarfiuvormi pisortanit pigineqartoq. Aamma oqarsinnaavunga, pisortat suliffeqarfiutaannut atorfimmi taama ittumi piffissami aalajangersimasumi sulinissamik isumaqatigiissuteqarsimagaanni, pissutsit qanoq innerisa avammut tusarliunneqartarnissaat naatsorsuutigisariaqarmat. Uuma pisup isertuunneqarnissaa naatsorsuutigisimagaanni, tamanna meerarpallannerujussuussaaq, Niels de Coninck-Smidt oqarpoq.

Flemming Knudsenip Pâviâraq Heilmannillu 14,5 millioni koruunit qanoq avissaneraat avammut tusarliunneqanngilaq. Niels de Coninck-Smith Pâviâraq Heilmannilu aamma akissuteqarusunngillat. Pâviâraq Heilmannili mailikkut Qanoruumut allakkamini oqarpoq, aningaasat affaaluunniit inorlugit tigusaqarsimanani.