Milliardit affaanik tapiineq ukiormanna nuimanerpaavoq

Radioaviisimit tamanna qarasarmioralutigu ima apeqquteqarpugut: Sooruna nunatta suliffeqarfiisa annersaat ajornartorsiortoq? Aamma sooruna naalakkersuisut aningaasaleeqqissimasut?

Ukioq manna Royal Greenlandimut ilungersunartuusimavoq, akiligassammi alliartuinnavissimapput, isertitakinnerujartuinnarsimallutilu, nunarsuarmilu aningaasatigut ajornartorsiortoqalermat Royal Greenlandimut aningaasaliisimasut aatsaat iluamik qungujussaarutiivissimagaluarput, suliffeqarfissuarlu akilisinnaajunnaangajassimalluni.

Akiligassavut isertitaqarnitsinniit annertunerulersimapput, taassumalu qaavatigut nunarsuarmi aningaasakilliorneq aallartissimalluni, taamaammat aningaaseriviit uagutsinnut tatiginnissimagaluartut atukkiiumassuseeruttuusisimagaluarput, uffa suliffeqarfipput pisortanik pigineqaraluartoq.

Aningaasanimmi atukkiiniaraanni assigiinngitsunik naatsersueriaaseqartariaavoq, qangatoornerusoq tassaavoq: suliffeqarfik nalinga tikiinnarlugu aningaasanik atukkerneqarsinnaavoq, naatsersueriaaserlu nutaajunerusoq imaalluni: Suliffeqarfik ineriartortinneqarniaruni nalingata marloriaataanik atukkerneqarsinnaalluni.

Royal Greenlandili nammineq nalinganit pingasoriaammik akiitsoqalersimavoq, suliffeqarfissuarlumi matuinnannginniassammat naalakkersuisut aasaq manna ½ milliard koruuninik aningaasaliisariaqalersimallutik.

Sooruna naalakkersuisut taamatut aningaasaliisariaqalersimasut?

Apeqqullu aningaasaqarnermut naalakkersuisup Palle Christiansenip imatut akivaa:

Royal Greenlandi akiliisinnaajunaarsimagaluarpat nunatsinnut sunniuteqarnerluttussaasutut nalilersimavarput, akiliisinnaajunnaassangaluarpammi nunatsinni suliffeqarfippassuit aningaasanik attartorsinnaaneranut aamma sunniuteqarnerlussinnaammat allatut ajornartumik aningaasaliisariaqalersimalluta.

Tassa nunatsinni sulisut 900-ut soraarsiinnarneqarsimasinnaangaluarput, imatut paasillugu: Inuit 900-ut Nunatsinni pilersuisooqataasut pilersuganngussangaluarput, tamannalu nunatsinnut suli akisunerulersimassangaluarluni, tassa suliffeqarfissuaq uniinnarsimasuuppat nunatta aningaasaqarniarneranut ajorluinnartumik pisoqartikkumanagu aningaasaliisariaqarsimavugut.

Eqqartuussiveqarnermut nutarterisimaneq ukiortaami atuutilertussaq aqagu sammiumaarparput.