Miliuunerpassuarnik akeqassaaq
Saqqummersitsivissamik titartaasut ilaat, illunik titartaasarfimmi BIG-imi piginneqataasoq Andreas Klok Pedersen taamatut nalunaarpoq.
- Suliariniakkap qanorpiaq akeqarnissaa suli naatsorsorneqanngilaq, qanorli isikkoqassanersoq maannakkut naammassivarput, aamma sanaartornerata qanoq akeqarnissaa ingerlatsinermullu qanoq aningaasartuuteqartoqartassanersoq tulliullugu missingersuusiussavarput. Sananeqarnera 150 miliuunit koruunit sinnerlugit akeqarnavianngilaq, illulli taamatut isikkullit taamatullu angissusillit tamassuma missaani akeqartarput, Andreas Klok Pedersen oqarpoq.
Koruunit miliuunerpassuit katersorniarnissaat siulersuisut tulliullugu suliarisussanngorpaat. Saqqummersitsivissaq 2006-imili aningaasanut inatsimmut ilanngunneqarnikuugaluartoq ulloq manna tikillugu 600.000 koruuniinnaat pisortanit aningaasaliissutigineqarsimapput. Taamaammat saqqummersitsivissap sananeqarnissaanut ingerlanneqarneranullu aningaasartuutissat siulersuisut aningaasaateqarfinnut qinnuteqaatigeqattaartussanngorpaat.
Aningaasaateqarfinnut saaffiginnittartussanut ataatsimiititaliortoqassasoq Bjørn Nørgaard siulersuisuni ilaasortaasoq nalunaarpoq.
Ungasinngitsukkut siulersuisut ataatsimiilerpata ataatsimiititaliaq pilersinneqassaaq, illunillu titartaavinniit BIG-miit Nuummiillu TNT-miit kiisalu Kalaallit Inuiattut eqqumiitsulianik saqqummersitsivissap ikinngutaasa peqatigiiffianniit ataatsimiititaliaq ilaasortaqassangatinneqarpoq.
Ukiut marluk qaangiutsinnagit sanaartorneq aallartinneqarsinnaassappat sukkasuumik tapiisussarsiortoqartariaqarpoq, naammattunilli katersisoqarsinnaanngippat ukiut marluk qaangiuuppata illunik titartaasarfik qularnaveeqqutinik aningaasaliiffigineqartalissalluni.
Aningaasaateqarfiit tapiisinnaasutut isigineqartut siulersuisunit maannaagallartoq pingaarnersiorneqarput, sulili qinuteqaateqartoqanngilaq.
Saqqummersitsiviliassaq katersugaatissaqalereersoq ippassaq radioaviisimi eqqaavarput. Hans Lyngeugaluup suliaanik Inge Lyngep tunissuteqarnerata saniatigut, eqqumiitsulianik 53-inik tunissuteqartoqareersimallunilu pisisoqarsimasoq, Bodil Kaalundip siulersuisuni aamma ilaasortaasup oqaatigaa.
Eqqumiitsuliornermik ilinniarfimmi ilinniartut suliaat, Pia Ark´ep suliai kiisalu Otto Rosingip suliai, aamma Kalaallit Nunaata Radioani pisortaasimasup Frederik Nielsenip pigisimasaa, panianit tunissutigineqartoq, saqqummersitsiviliassap maannakkut katersugaatigai.
Illunik titartaasartoq tusaamasaq, Bilbaomi Guggenheim Museumimik titartaasoq, amerikamioq Frank Gehry saqqummersitsiviliassamik titartaatinniarneqartoq, tusagassiuutitigut siornatigut tusarliunneqarnikuuvoq. Titartaasartulli akisutitsivallaarnissaa siulersuisut aarleequtigilerlugu Bjarke Ingelsip, siunissami illunik titartaallaqqissutut ilisimaneqalertussaagunartup titartagaa toqqarneqarsimavoq.
