Mikkel Bianco: Piterarmat sarfaarukkatta annilaangaleraluarpugut

Tasiilami ippassaq piterarujussuarmat umiatsiat, biilit qamuteralaallu piteqqamit oqigisaaqalutik teqqarput. Nunatsinnili politiit naapertorlugit inunnik ajoqusertoqarsimanngilaq.

- Ippassaq unnukkiartulersoq piteraq takkutillattaalerpoq kisianni sakkortunani, unnukkiartorneranili sakkortusiartuinnarpoq.

Angallatillit angallataatitik qajannaarsorlugillu parnaarsorsimagaluarpaat, unnuarli sakkortuseruttorami 50-t sinnerlugit anorlilermat angallatit ilaat teqqaasimapput, Tasiilarmiu Mikkel Bianco KNR-imut oqaluttuarpoq. 

AAMMA ATUARUK Tasiilami arfinngorpat piterarnissaa DMI-mit ilimasaarutigineqarpoq

Piteqqap sakkortunerpaaffia unnuaq ataatsip missaani pitoraappoq, taamaalimmallu illoqarfiup qullii uppikaalerput innaallagiarlu qamittoorpoq.

- Illoqarfik innaallagiaaruppoq sunalu tamarmi taartuinnanngorpoq, taamaalimmat annilaanganarsivoq, Mikkel Bianco oqaluttuarpoq.

Illullu igalaavi aseruatiterput.

- Sioqqat ujaqqallu teqqarnerisa igalaat eqqortarpaat aserorlugillu, Mikkel oqaluttuarpoq taassuma illut teqqaratarsinnaanerat ernumagileraluarpaa.

 

Assiliisoq: Thomas Ørum Kristensen

Illut illoqarfiup kimmut sineriaaniittut ujaqqanik teqqaasunik eqqorneqarnermikkut aserortarput.   

- Tusartarnikuuarput 1970-mi piterarujussuarmat illut teqqarsimasut, taanna eqqaaqqajaanarsigaluarpoq ernumaleraluarpugut, Mikkel Bianco oqarpoq.

Ullaaq manna piteraq qaangiutereerpoq, Mikkelilu biilerluni illoqarfimmut alakkarterivoq.

- Makiinnarlunga biilerlunga umiatsiara qamuteralaatikkalu alakkarpakka, qujanartumik taakku ajunngillat, sanianiittulli umiatsiarujussuit aserorsimapput, takullugit amiilaarnaqaaq, Mikkel Bianco oqaluttuarpoq.

Kalaallit Nunaanni politiit pigaartuisa ittuat Jørgen Madsen naapertorlugu unnuap ingerlanerani inuit 47-t angerlarsimaffiiniit qimagussorneqarsimapput, taakkunannga 30-t maanna katersortarfimmiipput, 13-t ilaquttaminnut qimarngupput sisamallu napparsimavimmiillutik.

Taakkuli piteqqamik peqquteqartumik napparsimavimmut unissimanersut ilisimaneqanngilaq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl