Mikkel Andersen talerminnermi Danmarkimi pissartanngorpoq

Nukersorluni timersornermi kalaallimik Danmarkimi pissartanngortoqaqqippoq.

Tassami Mikkel Andersen Ilulissaneersoq talerminnermi, aamma armwrestlingimik taaneqartarumi, 78 kilo ataallugu oqimaassusilinni Danmarkimi pissartanngorpoq. Saamiata nukii aamma sølvinnassutaapput.

- Supermatchenimik taaneqartartumi, unammisut marluk imminnut tallimariarlutik unammineranni aamma unammisannut 3-0-mik ajugaavunga. Taamaattumik pissarsiaqarluarpugut assut nuannaarutigisannik, Mikkel Andersen KNR-mut oqarpoq.

Siornatigut Danmarkimi pissartanngorniuttuni peqataasarpoq, maannalu pissartanngorniunnissat sioqqullugit pissangatigisimavaa sungiusarsimassutsini qanoq pissarsissutaasinnaanersoq.

Isiginnaartut nukissaqartitsisut

78 kilo ataallugu oqimaassusilinni peqataasut 17-iupput.

- Peqataasut arlallit aatsaavik unammivakka. Ilai manngilaartortaqarput, Mikkel Andersen oqarpoq.

- Aamma Nunatsinniit peqataaqatigalu Nuka Hansen kalaallinit isiginnaarianit tapersersorneqarluarpugut, tamannalu sunniuteqarluarpoq, Danmarkimi pissartanngorlaaq oqarpoq.

Nuka Hansen supermatchimi aamma unammivoq. Unammisut marluk imminnut tallimariarlutik tassani unammisarput amerlaneriarluni ajugaasoq ajugaasuusarluni. Nuka tassani 2-3-mik ajorsaqqalaarpoq.

Annikitsutut isikkoqartut unamminermi aalajangiisuusinnaasarput sekundit arlaqanngitsut nukiit tamaviaartillugit talerminneq pisarmat.

- Unammisaqattaarnermi sukkassuseq pingaartippara. Unammisassakka aamma isiginnaaqattaarpakka takusinnaajumallugu qanoq unammeriassanerlugit, Mikkel Andersen naggasiivoq.