- Uummannami inissaaleqisoqareerpoq, Mikkel Jeremiassen oqarpoq.Assi: Johannes Olsen KNR

Mikkel 2017-imi tassaarsuaqarnerata kingorna nuutsinneqarpoq: Tassuma nuukkusuttoqarnissaa qularutigaa

Mikkel Jeremiassen Nuugaatsiami kommunefogdiusimavoq. Taanna Uummannami ullumikkut najugaqarpoq.

Mikkel Jeremiassen nunaqarfimmi Nuugaatsiami kommunefogdiusimavoq.

Nunaqarfik taanna 2017-imi tassaarsuaqarnerani eqqugaavoq, innuttaasullu tamarmik qimagussorneqarput. Mikkel Jeremiassen Uummannami ullumikkut najugaqarpoq.

- Nalunaarusiaq atuarpara, tassa maluginiarpara annertunerpaassaguni pisut sakkortunerpaamiisaguni taamaaratarsinnaarpasittoq, annikigisassaanngilaq annertuvoq, Mikkel Jeremiassen oqarpoq.

Taamalu pisoqaratarsinnaavoq. Aarlerinartunimmi naliliineq nutaaq Karrat Kangerluata eqqaani najugaqartunut nutaarsiassatsialaanngilaq.

AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut

Karrat Kangerluanni qaqqami ulornartorsiortitsisoq ataatsikkut sisuussagaluaruni tamanna annertuumik tassaarsuaqartitsisinnaavoq. Tassaarnera aallaqqaammut ilisimagineqartumit annertunerungaatsiarsinnaalluni.

Qaqqaq ulorianartorsiortitsisoq ataatsikkut sisuussagaluaruni tamanna nunaqarfiit Qaarsut, Niaqornat, Saattut, Ukkusissat Ikerasaallu taavalu Uummannap ilarujussuinut tassaarsuaqartitsisinnaavoq.

Malissuit Nuugaatsiamut 500 meterimik tiffartigisinnaapput. Nunaqarfik taanna 2017-imi tassaarsuaqarneraniilli inuerunnikuuvoq.

176-it nuunnissamut neqeroorfigineqartut

Nalunaarusiaq Danmarkimi Kalaallit Nunaannilu nunap qanoq issusianik misissuiffimmit, GEUS-imit, aaamma norskit nunap pissusianik ilisimatusarfiannit suliarineqarpoq.

Ajornerpaamillu pisoqassagaluarpat tassa qaqqami ulorianartorsiortitsisoq ataatsikkut sisuussagaluaruni innuttaasut 176-it missaanniittut angerlarsimaffii tassaarsuarmit eqqugaaratarsinnaapput.

Innuttaasut ima amerlatigipajaartut nuunnissaminnik periarfissinneqarput:

 

  • Niaqornat: 35
  • Qaarsut: 113
  • Uummannaq: 10
  • Saattut: 8
  • Ukkusissat: 3
  • Ikerasak: 7
  • Nuugaatsiaq: Najugaqartoqanngilaq
  • Illorsuit: Najugaqartoqanngilaq

 

Katillugit: 176

 

Paasissutissarsiffik: Naalakkersuisut

Innuttaasut taakku 176-it nuunnissaminnut maanna periarfissinneqarput – taakkununngali nutaanik sanaartortoqassannginnera pissutigalugu inissianik attartortitsisoqassalluni.

- Kisianni aamma eqqaamassavarput suumiiffinni pineqartuni inuit namminneertuupput nammineq illoqarput kia ornigissavaa attartukkamut nuunniarnissaq, aamma akisuujupput, Mikkel Jeremiassen oqarpoq.

- Taamaatumik apeqqutit tamakku, imminermini ajunngitsuugaluarpoq taamatut periarfissiineq. Kisianni amerlanerpaat Uummannamut neqeroorfigineqassappata Uummannami inissaasuarneq pioreerpoq, Uummannami tattoqilliuunneq umiatsiaaqqanik angallatitsigut aalisarfitsigullu pioreerpoq. Taamaattumik takorlooruminaaqaat taakkulu 176-it neqeroorut atussaneraat.

Takusaq amiilaarnartoq

Immikkut ilisimasallit qaqqap ulorianartorsiortitsisoq qaammataasatigut assilisat atorlugit naliliiffigaat.

Piffimmilu tassani imaanik nakkutilliisoqarpoq, taakkulu immap qaava allaanerusumik isikkoqaleriartussagaluarpat aarlerisaaruteqartussaapput.

 

 

Qaqqalli nikilaartuaannarsimapput, taamaammat piffik siunissamik nakkutigineqarnerusariaqartoq, Mikkel Jermiassen isumaqarpoq.

- Uanga Nuugaatsiamut peqqaarpunga 1998-imi, taava taamanikkut utoqqaat angumerisakka ullumikkut qanganngoreersut 1940 -1950-ikkunnili taajanna umiamuut qaqqaat timmissat najortuartarsimagaluarpaat, kisianni nakkaarusaartuartuummat ilanngarterusaartuartarsimammat timmissat qimassimavaat

- Kisianni tassa isumaqarpunga upalungaarsimaneq nakkutilliinerlu tamatigoornerulertariaqartut ataavartumillu.

Mikkel Jeremiassenip Nuugaatsiami 2017-imi tassaarsuaqarnera nammineq misiginngilaa. Tassaarneratami nalaani aallaqqasimavoq, taannali pisoqarnerata kingorna qulimiguulimmik nunaqarfiliarpoq, taassumalu takusani ilisarisinnaasimanngilaa:

- Qulimiguulimmik S-61-mik Nuugaatsiaq qulangeratsigu takusaq amiilaarnarpoq. Eqqumanerlunga sinnattornerlungaluuniit aperisariaqarlunga, Mikkel Jeremiassen KNR-imut taamani oqarpoq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat