"Mikisoq" soqutigineqarlualereerpoq

Titartakkanik filmiliaq Mikisoq, kalaallit oqaluttuaatitoqaannik aallaaveqartoq, naammassigiguni allanik malitseqaassaaq, tassami Mikisumik oqaluttuaq tv-kkut aallakaatitassiaaranngorlugu suliarineqartussanngoreerpoq.

Nukappiaraq uumasut meqquineq sapigaqartoq pillugu alutornartumik titartakkanik filmiliaq saqqummeruni filmertarfissuarni alutorsartitsissaqisoq, ilitsersuisup Jesper Møllerip qularinngilaa.

- Qanoq oqaluttualiap tulleriissaarneqarnissaa suliaralugu naammassilivipparput, aningaasallu atorfissaqartitagut tamakkerlugit pissarsiaringajalerlugit. Taamaattumik filmiliarinera aallartissinnaannguliivipparput, Jesper Møller aallartippoq.

Ilitsersuisoq A-film-imi sulisuusoq aamma oqarpoq, danskit titartakkanik filmiliaat Asterix, Terkel i Knibe aamma Hjælp, jeg er en fisk tusaamasaasut assigalugit, una kalaaliaraq pillugu titartakkanik filmiliassaq, aningaasanik Asteriximik filmiliornermi aningaasartuutit amerlaqataannik aningaasassaqartinneqanngikkaluarluni, pissangagineqartoq, allaat pisarnermit annermik.

Mikisoq immikkuullarissumik silarsuaqarpoq, kulturi inooriaaserlu alla aamma Kalaallit Nunaata alianaassusia oqaluttuarissallugit pingaartilluinnarparput. Isumaqarpungalu sumi tamani soqutiginnilersitsereerluta, Kalaallit Nunaanniinnaannngitsoq, aammali Danmarkimit, Tysklandimit, Canadamit nunanillu allanit titartakkamik filmiliamik soqutiginnittunit tusarluartalereerpugut.

- Neriunartoqaqaaq, pisarnermit allaat annerusumik, Jesper Møller naggasiivoq.

Filmi Mikisoq aallarnisarneqarnermini Nuna Fonden-imit taperneqareerpoq. Neriuutigineqarpoq suliarineranut kalaallit arlallit titartaaqataajumaartut. Filmi juullimi 2008-mi saqqummissangatinneqarpoq.