Mikisoq Lynge: Torrassuaq

Filmi Nuummioq Sundance Festivalemi akissarsisinneqassanersoq arfininngorpat paasinarsissaaq. Filmip takutinneqaqattaarnerani naliliisartut nersualaarinnittarput.

Mikisoq H. Lynge misigisaminut nuannaaqisoq apersorparput.

- Sundance festivalimiinnerput nuanneqaaq ingerlalluaqaagullu. Filmi Nuummioq pingajussaa takutereerparput, takutereerneratalu kingorna isiginnaartut apersorpaatigut oqallillutillu. Isiginnaariat alutorsartorujussuupput angalaqatigiittugullu tamatta nuannisaqaagut, Mikisoq Lynge oqarpoq.

Filmi Nuummioq filmit allat aqqanillit peqatigalugit nersornaammut World Cinema Dramatic Competitionimut innersuunneqarpoq, arfininngorpallu filmi nersornaaserneqartussaq toqqarneqarumaarpoq. Nuummiup takutinneqaqattaarnerani filminik naliliisartut nersualaarisupilussuupput. The Hollywood Reporter Nuummioq filmitsialassuartut nalilerpaat, Filminik naliliisartut magasiiniat Variety tupaallaqalutik naliliipput. Filmip Nuummiup iluatsittumik naammassineqarsimanera immini tupinnarpoq, tassami Kalaallit Nunaanni filmiliortarneq naliginnaasuunngilaq. Taamatullu nalililiisoqarsimanera Mikisoq Lyngep tuppallernaraa.

- Taamatut naliliinerit kusanarput. Inuppassuit oqartarput nuummioq sundance festivalimi takuneqarsimasut pitsaanerpaat ilagigaat. Taamatullu naliliineq pikkunaqaaq uppernanngingajallunilu. Saqqummersitsisartorput oqarpoq taamatut naliliisunik siornatigut sundance festivaleqarnerani takusimanngisaannarluni, taamatullu naliliinerit filmip nuummiup pitsaasuuneranik isumaqannguatsiarput, Mikisoq Lynge oqarpoq. Taanna ulluni kingullerni nunani allani filminik siammarterisartunik isumaqatiginninniuteqarpoq, neriupporlu piffissami qaninnermi atsioqateqarumaarluni.