Miki Jacobsen eqqumiitsuliaminik saqqummersitsivoq
- Erlinnartuni pingaartitatsinnilu pissarsiniarutta, saffiugassanik Isukasianut aallertariaqanngilagut. Nuuk qimalaaginnarlugu qaqqaqarpoq, uumasoqarpoq assullu silaannarilluni. Tassa tamakkuupput pisuussutitta amerlaqisut ilaannaat, aningaasanik taarserneqarsinnaanngitsut, saqqummersitsinerminut atatillugu Miki Jacobsen oqarpoq.
Taassuma qalipaalluni eqqumiitsuliai ilaatigut tassaapput pinngortitaq uumasullu aamma savimerngit amitsut atorlugit ilusilersukkat. Taama eqqumiitsuliornerminut isumassarsiffigisaa tassaavoq, Nunatta aningaasassaannik siunnersuuteqarluni, Danmarkip naalagaaffiata aningaaserivissuani sulinermini pissarsiffigisai.
Miki Jacobsenip eqqimiitsuaminik saqqummersitsinini taaguuserpaa, Isuanit nuuanut, saqqummersitsinerlu taanna GrønlandsBANKEN-imi marsip 31-ata tungaanut takuneqarsinnaalluni.