Mike Tyson politiinit tigusaaqqippoq
Tilluuttartuni oqimaannerni siornatigut nunarsuarmi pissartaasimasoq Mike Tyson imigassartorsimalluni biilersimasutut ikiaroornartumillu tigumiarsimasutut pasineqarluni ullaaq tigusarineqarpoq.
Politiit biilii apungajavissimavai ullaaralaakkut natklubbi naalagaaffimmi Arizonamiittoq qimakkamiuk biiliminullu iseriarluni aallarluni. Politiit siornatigut tilluuttartuusimasoq 40-nik ukiulik malippaat unitsillugulu.
Tigusarineqarpoq pilertortumillu misissuisoqarmat paasinarsilluni kokainimik tigumiarlunilu biiliminiititaqartoq. Imigassat kimittuut arlalissuussagunartut aamma imersimassagunarpai.
Unnuaanerani parnaarussaavoq tallimanngornerullu ingerlanerani eqqartuussivimmut sassartinneqassalluni.
Tyson siornatigut inatsisinik unioqqutitsisarsimavoq. 1992-imi arnamik pinnersumik pinngitsaaliisimasutut ukiuni arfinilinni parnaarunneqartussanngorlugu eqqartuunneqarpoq, piffissalli affaannaa parnaarussivimmiilluni.
Mike Tyson tilluuttartutut siorna unippoq.
