Miitip tigussaasunik suliniuteqarnissaa Demokraatinit ujartorneqarpoq
Tigussaasunik suliniuteqartoqannginnera Demokraatit siulittaasuata kingumut uparuaqqippaa. Tamatumuuna Miiti Lyngep danskit ministeriat Martin Lidegaard peqatigalugu Ittoqqortoormiini tikeraarnerminut atatillugu silap pissusiisa allanngoriartornerinik qanimut takusaqarsimanera pineqarpoq.
Jens B. Frederiksenip Miiti Lynge Tunumut tikeraarsimaneranik nersualaarpaa, Frederiksenilli paasisinnaanngilaa naalakkersuisup tunumut tikeraarnermi kingorna sooq tigussaasunik suliniuteqarsimannginnersoq. Miiti Lyngemut nassuiaqquaa silap pissusiisa allanngoriartornerinut naleqqussarnissamut Naalakkersuisut sunik tigussaasunik suliniuteqarnissaannik naatsorsuuteqarsinnaanersugut.
- Demokraatini allatulli soqutigaarput Naalakkersuisut suliniutinik sunik aallartitsiniarnersut uangut inuiaqatigiittut silap pissusaata allanngoriartorneranut naleqqussallaqqinnerulernissarput qulakkeerniarlugu. Ajoraluartumilli Ineqarnermut, Pinngortitamut Avatangiisinullu Naalakkersuisoq oqaatsiminut erseqqissaanngilaq angalagamilu isumassarsiami kusanaartut ilaannut assersuusiorani. Tamaaliornissaanut matumuuna periarfissipparput, Frederiksen Miiti Lyngemut § 37 naapertorlugu apeqquteqaatiminut atatillugu taama allappoq.
