Miiti Lynge Naalakkersuisutut tunuarpoq

Partii Inuit naalakkersuisoqatigiinnit peersitaapput. Naallu Nikku Olsen, Randi Broberg aamma Miiti Lynge peersitaagaluartut matumik matorluisoqanngitsoq, Naalakkersuisut siulittaasuata Aleqa Hammondip erseqqissaatigaa, Partii Inuillu naalakkersuisoqatigiinnik siunissami taaseqataasarnissaanut isumaqatigiissusiortoqarsimasoq. Isumaqatigiissutip ilusissaa ulluni qaninnerni naammassineqarumaartoq nalunaarutigineqarpoq.
Allattoq Mads Lynge
oktobarip 24-at 2013 06:15

Miiti Lyngeli tassa Naalakkersuisutut tunuarpoq. Taamaakkaluartorli inuttaa qungujussinnaasoq Radioaviisip tusagassiortunik katersortitsereernerup kingorna naapippaa:

- Ajunngilaq, tassa taamaappoq politikki, susinnaanngilarput, Ineqarnermut, Pinngortitamut Avatangiisinullu maannamut Naalakkersuisuusimasoq Miiti Lynge oqarpoq.

Naalakkersuisuujunnaartoq akisussaaffisaminut ilungersortutut ilaatigut pissuseqartartoq malunnartarpoq, nakanngilarli:

- Tassa taanna taamaappoq politikkimi, susoqarsinnaavorluunniit, sakkortuumik oqaluttoqarsinnaavoq, qanorluunniit oqaluttoqarsinnaavoq. Tassa ammavoq, politikki taamaappoq, Miiti Lynge oqarpoq.

Naalakkersuisoqatigiit isumaqatigiissutertik ukioq manna marsip ulluisa 26-anni atsioqatigiissutigaat, Miiti Lyngelu sivikitsumik Naalakkersuusimagaluarluni politikkikkut suliaq pissanganartuusimanerarpaa:

- Pissanganarlunilu nuannersimavoq, oqarpoq.

Taassuma politikkikkut suliaq nangeqqissanerlugu suli naluaa

- Massakkut taanna akisinnaanngilara, tassa massakkut taama inissisimavunga, qujanaq, Partii Inuit sinnerlugit Ineqarnermut, Pinngortitamut Avatangiisinullu maannamut naalakkersuisuusimasoq Miiti Lynge oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq