Miissuinermut immikkut 10%-inik akitsuusersuisoqassangilaq
Siunnersuut saqqummiunneqaqqaarpoq 2011-mi, Atassutilli Inatsisartuni ilaasortaatitaanut naalakkersuisoq akissuteqarluni allappoq - nunarsuarmi pissutsit maanna allanngorsimasut.
Taanna aamma oqarpoq, ukiut qulit sinnerlugit ingerlareersut aatsaat siullerpaamik maannakkut nunami maani aatsitassarsiorfimmik ingerlasoqarunnaartoq, peqatigisaanillu 2002-imit aatsaat siullerpaamik misissuinissamut akuersissutit amerliartorunnaartut erseqqissumik malunnartoq.
Taamanikkut 2011-imi siunnersuuteqartoqarmat, nunani tamalaani aningaasaqarneq erseqqissumik siuariartortoq malugisimaneqarpoq, aammalu 2011-imi aatsitassanut suliassaqarfimmi ingerlatat amerlasoorujussuullutik. Pissutsilli taamaakkunnaarsimapput.
- Misissuinermut akitsuusiisalernissamut siunnersuut ingerlatseqatigiiffinnut Kalaallit Nunaanni misissuinissamut akuersissummi suliaqartuusut imaluunniit qinnuteqarnissamik kissaateqartut misissuinermut aningaasartuutaannik qaffatsitsisussaavoq. Maannakkut niuerfik taamaatsillugu ingerlatseqatigiiffiit mikisut taakkua misissuinermi ingerlatanik ingerlatitseqqinnissamut imaluunniit aallartitsinissamut aningaasalersuutissanik pisariaqartunik nassaarsinnaajunnaarnissaat aarlerinaateqarpoq, Jens-Erik Kirkegaard oqarpoq.
Peqatigitillugulu erseqqissarpaa Kalaallit Nunaat qaffasissunik aningaasartuuteqarfiusartutut ilisimaneqartoq, aammalu akitsuutit ilaneqarneranni unammillersinnaassuseqarneq sanngiillisinneqassasoq. Tamanna inuiaqatigiinnit isigalugu suliffeqarfiit misissuinermut ingerlatassanut aningaasaliisarunnaassappata, taamaalillunilu suliffissanut periarfissat akileraarutinut akiliuteqarnernik malitseqartussat piviusunngortinneqanngippata tamanna sunniuteqarlussasoq.
- Kaaviiaartitaqalernermi aammalu tunisassiulivinnermi sinneqartooruteqarnermilu akitsuusersorneqarsinnaasunik suliffeqarfiit aatsaat tassani akileraaruteqartinneqartassappata naleqqunnerussasorinarpoq, Kirkegaard Atassummut akissuteqarluni taama allappoq.
Aammattaaq oqaatigaa aatsitassanut suliassaqarfimmi siunissami ingerlatassaalertussat, aammalu aatsitassarsiorfimmik inerisaanissamut periarfissat eqqarsaatigalugit, siunissamut ungasissumut eqqarsarnissaq pisariaqartoq. Tamannalu anguniarlugu Naalakkersuisut aatsitassanut periusissaq ataatsimoortoq nutaaq suliarineqaleruttorpaat, aappaagui upernaakkut ataatsimiinnermi saqqummiunneqarsinnaassasoq naatsorsuutigineqarluni.
