Miilu Rosing: Qangamita taama qiimatigigatta

Amerikap nunavittaani assammik arsarluni unammersuarnissanut Kalaallit Nunaat ippassaq annguppoq. Montevideo-mi Uruguay-imiittumi aasaru juunip 22-annit 29-annut unammisaqattaartoqassaaq.

Assammik arsartartut angutit maannamut Cuba, Puerto Rico aamma Mexico ajugaaffigereerpaat. Saamerlermilu arsartartup Miilu Rosingip oqaatigaa arsartartoqatigiit nukissaqarluartutut misigisimallutik Mexicomiittut.

- Ullut marluk arpaannaavikkaluarluta suli nukissaqarluarluta misigisimavugut. Arsartartoqatigiiuvugut teknikkikkut pikkorissut, arpaannaavissinnaasut. Qasuleraangatta anisarpugut, taava nukissaqarluartoq nutaaq isertarpoq, qasuersersimasorlu kingorna iseqqittarpoq, sukkassuserpullu, tassa temporput, paariinnaavissinnaasarparput, sukkasuumillu saassusseriasaarsinnaasarluta, assammik arsarluni nunanut allanut unaammisartoq Miilu Rosing, oqarpoq.

Puerto Ricomut unammineq sakkortusimaqisoq, Miilu Rosingip oqaatigaa, kalaallillu målinik sisamanik kinguarsimagaluarlutik.

Qulliit timersortarfimmiittut unamminerup ingerlanerani qamittooraluartut, Miilu Rosingip ilanngullugu oqaluttuaraa, tamannali iluarsineqarmat unamminerlu nanginneqarmat, kalaallit isertitseqqittalersimapput:

- Ajugaasinnaanerput unamminerup ingerlanerani upperiinnaavillugu, saassussisarnerpullu naggataatigut iluatsiinnaavipparput. Aamma saassussinermi kikkut suna isumagisassaneraat nassaareriaratsigu pitsaanerulerpoq, Miilu Rosing oqarpoq.
 
Kalaallit Mexicomiut 31-24-inik ippassaq ajugaaffigaat.