Michael Rosingip silap pissusia pillugu anguniagassat paaserusuppai
- Nangaanermut tunngavilersuutit paasisinnaalluarpakka. Ajornartorsiutigisarali tassaavoq isumaqatigiissummi ilaanngikkaluaruttaluunniit nammineq anguniagaqarsinnaagatta, Demokraatineersoq, Avatangiisinut, eqqissisimatitsinermullu ataatsimiititaliami siulittaasoq, Michael Rosing taama oqarpoq.
Nunarpullu Parisimi silap pissusia pillugu isumaqatigiissummut ilaanngikkaluartoq nunatsinni qanoq annertutigisumik CO2-mik siunissami aniatitsitigissanersoq anguniagassamik Naalakkersuisut saqqummiussisariaqartut, Inuit Ataqatigiinni siulittaasoq, Sara Olsvig assigalugu, Michael Rosing inassuteqarpoq.
Aamma atuaruk Alternativet: Kalaallit Nunaat silap pissusia pillugu isumaqatigiissummut peqataasimasariaqaraluarpoq
- Parisimimi isumaqatigiissummi periaasissatut suliarineqartut uagutsinnut tulluanngikkaluartut taamaaliornikkut silap pissusianut akiuiniarnermut peqataanerput oqaatigisinnaavarput, Michael Rosing oqarpoq.
Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúkop partiit Naalakkersuisuutitaqartut naalakkersuisooqatigiinnermut isumaqatigiissutaanut unnersuussivoq:
- Anguniarneqartussaq 2024-nngortinnagu uagut nammineq nunatsinninngaanniit, nunatta tunniussinnaasaaninngaanniit, minguitsumik nammineq pilersorsinnaanissaq. Taannalu uagut naalakkersuisuninngaanniit pimoorullugu suliaq ingerlapparput, Mala Høy Kúko oqarpoq.
Aamma atuaruk Vittus: Silap pissusia pillugu isumaqatigiissut Nunatsinnut pitsaasuunngilaq
Nunattali qanoq avatanngiisinut mianerinninnerulernissaanut pilersaarummik suliarinninnissaanut tunngasoq, Michael Rosing isumaqarpoq.
- Ullumikkummi suliffissuarnik, inissiani, assartuinermilu atortorisatsinnit CO2-mik aniatitsinitsinnik annikillisaanissatsinnut anguniagaqarutta ajoqutiginavianngilarput. Michael Rosing oqarpoq.