Michael Rosing: Namminersorlutik Oqartussat qanganisarpasippallaaqaat
Avannaani Tunumilu pisiassanik piffissami kingullermi amigaateqarneq pillugu oqallinnermut ilanngulluni Demokraatiniit Folketingimut qinigassanngortittoq, Michael Rosing, taama oqarpoq.
- Demokraatit, social-liberal-imik politikkillit, siulittaasuata Namminersorlutik Oqartussat, uagut isumarput naapertorlugu ingerlatassarinngisaanik, ingerlatsisuni qullersaanera imminut assortuuttutut oqaatigineqartariaqarpoq, Michael Rosing, partiip siulittaasua, Jens B. Frederiksen, eqqartorlugu, atuartartut allagaannik Sermitsiami, ullumi saqqummersumi, allappoq.
Soorliuna Namminersorlutik Oqartussat nunaqarfinnut pilersuinera ajorigaa? Pisiniarfimmi niuerneq minnerulissammat, tassami aningaasat isertinneqartussat Namminersorlutik Oqartussanut tussagamik, nunaqarfimmi kaaviaartinneqaratik. Pisiniarfiillu namminersortut pisiniartumik piumasaat qanimut malinnaaffigisinnaagamikkit, Rosing oqarpoq.
Namminersorlutik Oqartussat nunasiaataanerup nalaani Danmarkimut sanilliuppaa. Tassami Namminersorlutik Oqartussat nunaqarfinnut pilersuinerat Danmarkip nunatsinnut nunasiaataanerup nalaani pissuserisaanut assingummat:
- Tunisassiorfinnik sanaattariaqarpavut, namminermi tunisassiorfiliorsinnaanngillat. Inuit namminneq suut nioqqutigineqassanersut aalajangersinnaanngimmatigik, suut nioqqutigineqassanersut politikkikkut aalajangertariaqarparput. Taamatut isiginninneq nikaginninneruvoq, aqutsiniartutullu ingerlatsineq tamanna qimattariaqarparput, Michael Rosing allappoq.
