Assi: KNR

Michael Rosing matu matorluutigalugulu Demokraatinit tunuartoq

Michael Rosingip Demokraatit politikkikkut ingerlatsinerat illersorsinnaajunnaarpaa, taamaammat partiimit maanna tunuarpoq.

- Demokraatit politikki ingerlataat illersorsinnaajunnaarpara. Demokraatiunera siornatigut tulluusimaarutigisarpara, qanganngulerporli taama misigisimagama. Politikkikkut suliniutit illersorsinnaanngisakka amerlaqaat, Michael Rosing tusagassiorfinnut nalunaaruteqarluni taama allappoq.

Michael Rosingip Demokraatit politikkikkut iliuuserisimasaannik illersorsinnaangisaminik arlalinnik allatuisimavoq. Ilaatigut raajartassiissutit 50-50-nngorlugit agguaateqqinnissaannik aaqqissusussineq akueralugu Demokraatit Inatsisartut upernaakkut ataatsimiinneranni taasinerat eqqaavaa.

- Demokraatit Nunatsinni inuussutissarsiortunut patajaatsunik atugassaqartitsisoqarnissaanik anguniagaqarnerannut unioqqutitsineruvoq. Aamma siunnersuutip ukiakkut saqqummiunneqarnerani akerlerisinnarlugu isummamik killormut allanngortitsineruvoq tunngavilersorneqanngitsoq, Demokraatini maanna ilaasortaajunnaartoq taama allappoq.

Michael Rosing Inatsisartuni ataatsimiititaliani ilaasortaaffimminik partiiminit apriilip qaammataani arsaarneqarpoq. Siulittaasoq Randi Vestergaard Evalden naapertorlugu Rosingip Inatsisartunilu gruppimi ilaasortat sinnerisa suleqatigiinniarnikkut ajornartorsiuteqarnerat tamatumunnga pissutaavoq.

AAMMA ATUARUK Demokraatini suleqatigiinnermik ajornartorsiut avissaartuutsitsisoq

Partiip politikkikkut siunnerfii naammaginagit Demokraatinit ilaasortaajunnaarnerit ukioq manna aapparaat. Poul Hansen maajip qaammataani partiimit aamma ilaasortaajunnaarpoq. Randi Vestergaard Evaldsenip, Justus Hansenip Nivi Olsenillu marloqiusamik ilaasortaaffeqarnerat akerleralugu partiimit tunuarpoq.

Michael Rosing Inatsisartunut 2014-imi qinigaanngitsoorpoq, Andreas Uldumilli politikkimik suliaqarunnaarneranut atatillugu Inatsisartuni ilaasortanngorluni. Rosing attaviitsutut ingerlaannaassaaq.

AAMMA ATUARUK Demokraatit avissaartuuttuarsinnartut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat