Michael Rasmussen sukkaniuteqataaginnarsinnaavoq

Sikkilertartoq Danmarkimeersoq Michael Rasmussen, sikkilerluni sukkaniunnerni nunarsuarmi sakkortunersaanni Tour de France-imi peqataaginnarsinnaassasoq, Tour de France-ip pisortaata Michel Prudhomme-p Montpellier-mi tusagassiortunik katersortitsinermini oqaatigaa.

Danmarks Radio-mi tusagassiortoq Henrik Liniger taama tusarliussivoq.

Michael Rasmussen sungiusariaraagaangami sumi sungiusarniarnerluni Danmarks Cykel Union-imut, DCU-mut, ilisimatitsissutigisarsimanngilaa, taamaaliortarsimaneralu kinguneqartinneqarluni. Tassa Danmarkip sikkilerlutik nunanut allanut unammisartuinit peersitaagami.

Taamaakkaluartoq Tour de France-imut peqataaginnarsinnaassasoq Tour de France-imi aaqqissuisut aalajangiusimavaat.

DCU-p iliuuserisai Michel Prudhomme-p apeqquserpai, Michael Rasmussenimik peersitsinissaminut DCU-p tunngavigisimasai amigaateqartuunerarlugit.

Michael Rasmussen Tour de France-imi siuttuulluni maanna sungaartumik tujuululerluni Frankrigimi sukkaniuteqataavoq.

Michael Rasmussen sumi sungiusarnerluni DCU-mut ilisimatitsissuteqartarsarsimannginnera DCU-mit juunip qaammataanili ilisimaneqarsimagaluarpoq, aatsaallu massakkut iliuuseqartoqarluni.

Tamanna Prudhomme-p aamma apeqquserpaa, DCU-lu annertunerusumik ilisimasaqarsimassappat, ilisimasat saqqummiuteqqullugit piumasaralugu.