Michael Rasmussen pasinaatilimmik nukkassaammik aava akoqarsimavoq

Qallunaaq sikkilerluni Tour de Francertuni peqataagaluarluni anisitaasoq eqqartukulunneqaqisoq Michael Rasmussen, sikkilertartuunermi nalaani pasinaatilimmik aava nukittorsaatinik akoqartarsimavoq.

2002-mi septemberip qaammataani CSC-miit Michael Rasmussen ingerlaarfiit ilaani ”Giro della Provincia di Lucca”-miit angerlartiinnarpaat aavata pasinartumik akoqarpallaarnera pissutigalugu.

Michael Rasmussen nammineerluni taamanikkut oqaluttuarpoq naarluleriasaarsimalluni kiaqalersimallunilu.

Taamanikkullu CSC-mi timersornermi pisortaasimasup, Johnny Weltzip maannakkut oqaatigaa, nammineerluni 2002-mi Michael Rasmussen unammersuarfiusumiit angerlaqquinnarsimallugu, sikkilertartoqatigiinni nakorsaasup belgiamiup aassiuinermini aava akoqarpallaartoq paasisimammagu.

Belgiamiup nakorsap, Piet De Moorip, DR Sportimut ilumoornerarpaa, Sports direktøriusimasup, Johnny Weltzip oqaasii.