Michael Rasmussen Dynepo-nik atuisimaneragaavoq

Aviisi L’Equipe-p uppernarsarsinnaanerarpaa, Rasmussenip sukasaatit epo-nik taasartakkat ilaannik Dynepo-mik atuisimasoq. Maanna Antidoping Frankrigimiit uppernarsarneqarpoq tusagaq ilumoortuusoq.

Dynepo inup sananeqaatai minnerit atorlugit sukasaatiliaavoq, epo-mik ullumikkut taagorneqartoq uumasut sananeqaataannit sukasaatiliaasoq.

Dynepo sukasaatinik atuinermik akiuiniarluni misissuivinnit ilisimaneqarpoq, sukasaatilli inerteqqutaasut dopingit allattorsimaffianni suli ilaatinneqarani.

Nunarsuarmi cykelertartut kattuffiata UCI-p misissuisarfik aasaq qinnuigaa Michael Rasmussenip quua misissorneqalerpat Dynepo-qarnera ilanngullugu misissorneqassasoq.

Dynepo ima nutaajutigaaq, allaat atorneqarsimasoq paasineqaraluaruniluunniit inatsisit ullumikkut atuuttut malillugit malersorneqaataasinnaanani.

Taamaakkaluartoq Anti Doping Danmarkimi siulittaasoq Jens Evald Ritzauimut oqarpoq, Michael Rasmussenimut tunngasoq suliassanngortinneqarluarsinnaasoq, suulluunniit sukasaatinut assingusut aamma inerteqqutaammata.

Michael Rasmussen Tour de France-mi ajugaasussatut ilimagineqaleruttorluni, sungiusarnini pillugu eqqortumik paasissutissiisiamannginnami holdinit Rabobankinit aasaq unammeqataajunnaarsitaavoq.