Michael Rasmussen: Aviisip allaaserisaa ilumuunngilaq
Sikkilertartup soraarsitaanikup Michael Rasmussenip italiamiut aviisiata La Gazetta dello Sportip nassuersimanerminik allaaserisaa ilumuunnginnerarpaa, Tour de France sioqqutilaarlugu juunip qaammataani Dolomit-it qaqqarsuiniissimanerminik pisuutitsiniarneq ilumuunnginnerarlugu, tamatuma nalaani Mexicomiissimanini suli aalajangiusimagamiuk.
Michael Rasmussen Italiamiut aviisianni ippassaq, issuaavigineqarpoq, juunip qaammataani Dolomit-it Pyrenærillu qaqqarsuiniissimalluni, tamannali Michael Rasmussenip ilumuunnginnerarpaa, suliamut tunngatillugu oqaaseqarsimannginnami.
- Taamatut allaaserinnissimaneq ilumuunngilaq. Oqarsimanngisaannarpunga Dolomit-it qaqqarsuini sikkilerlunga sungiusarsimallunga. Pyrenæerit qaqqarsuiniissimavunga tamannalu ilumoortoq oqaatigiuartarpara. Tamannalu aamma sikkilertartut kattuffiannut UCI-mut oqaatigisimavara, Michael Rasmussen, TV 2 Sportimut taama oqarpoq.
La Gazetta dello Sportimi aviisiliortoq pisimasumik paatsuuisimaneq pillugu Michael Rasmussenip nassuiaateqaqqullugu ullaaq manna oqaloqatigisimavaa, Michael Rasmussenillu oqaluttuami naqqiissuteqarfigineqarnissaa utaqqivaa.
DR on line taama paasissutissiivoq.