Michael Ramussen-ip e-mail-ia iserfigineqarsimavoq

Allattoq Jaaku Lyberth
juulip 31-at 2007 16:50

Sikkilerluni sukkaniuttartup Michael Rasmussenip, sapaatip akunnerani kingullermi Tour de France-mut ilaajunnaarsitaasup qarasaasiakkut allagarsisarfia susassaqanngitsumit iserfigineqarsimasoq aviisimi B.T.-mi allaaserinnittoqarpoq.

Rasmussen Tour de Francemut ilaajunnaarsitaanermi saniatigut aammattaaq sikkilertartutut holdiminit, Rabobankimit soraarsitaavoq, tassa sikkilerluni sukkaniunnissarsuaq sioqqullugu sumi sungiusarsimanini eqqortumik nalunaarutigisimannginnamiuk.

Tassa Rabobankip soraarsitsineranut allakkat aamma Rasmussenip sumiissimaneranut tunngasut allagarsisarfimmut naalanngisaarluni isertup pissarsiarisimavai. Naalanngisaarluni isertup paasissutissat inummut tunngalluinnartut aviisimut B.T.-mut tuniniarsimagaluarpai, paasissutissalli aviisip ilanngukkumasimanngilai.

Rasmussenip pisoq tupaallaatigeqaa. B.T.-mut ima oqarpoq:

- Piffissami kingullermi inuttut inuunera ajoqusersorneqaruttortoq aamma tassa taama pineqarpunga.

Naalanngisaarluni allagarsisarfimmut isertup Michael Rasmussenip isissutissamisut ilisarnaataa eqqoriaanermigut pissarsiarisimagunarpaa. Taamaattorli qarasaasiakkut allagarsisarfinnut naalanngisaarluni iserneq pillarneqaataasussaavoq, tassa ukiup aappaa avillugu parnaarussaanermik pillarneqaataasinnaagami.