Michael Nielsen nassuiaateqarpoq

februaarip 23-at 2006 16:22

Great Greenlandip ukiuni kingullerni ingerlanneqarsimanera ammeriviullu massakkut inissisimalernini naapertorlugu siunissami qanoq inissisimalersinnaanera pillugu ammeriviup pisortaa ullumi nassuiaateqarpoq. Ammeriviup pisortaa oqarpoq puisit amiinik Canadameersunik piseqqittoqannginnissaa piginnittut; tassa Namminersornerullutik Oqartussat aalajangiusimaannassapassuk, tamanna ammeriviup siunissami ingerlanneqaranut kingunerluuteqarsinnaasoq.

Michael Nielsenip ullumi saqqummiussinermini Ammeriviup massakkut inissisimanini tunngavigalugu siunissaata qanoq isikkoqalersinnaanera saqqummiussaqarfigaa.

Ammeriviup massakkut inissisimanera aallaavigissagaanni siunissami allanngornernik assigiinngitsunik pingasunik pisoqarsinnaasoq Michael Nielsen oqarpoq. Allanngornerit amernik tunisassiaqarnermi isertitassat kingunerisaanik takutitsipput.

Ammerivik siunissami pitsaasumik ingerlasinnaavoq ukiumut ameerutaasut 120.000-iusassappat, taamaalillunilu ammerivimmi sulisut amerlassusaat nikippallaassanngilaq, amigartooruteqarpallaaranilu ingerlatsisoqarsinnaasaalluni. Amerivilli siunissami ajornartorsiulersinnaavoq ukiumut 60.000-iinnarnik ameertoqartassappat. Taamaalisoqassappat ammeriviup naammassisaqarsinnaanera 35 procentiinnanngussaaq, tamannalu sulisunik soraarsitsiortornermik kinguneqassaaq Namminersornerullutillu Oqartussat ukiumut tapiissutigisartagaannik suli amerlanerusunik pisariaqartitsisoqalissalluni. Michael Nielsenip erseqqisaatigaa assersuusiani qinikkanut ernumalersitsiniarnertut imaluunniit Canadamit amersisaleqqinnissamut pinngitsaaliiniarnertut paasineqassanngitsut, massakkulli pissutsit isikkuisa kingunerisinnaasaattut paasineqartariaqartut.

Naalakkersuisunut illuatungiliuttut Demokraatit oqaaseqartitaat Palle Christiansen oqarpoq Ammeriviup pisortaata paasissutissiinera assut iluarisimaarnartoq, taamaattorli puisinniartarnerup avataanit qanoq isigineqarnera pissutigalugu avammut tunisassiorneq nalorninartumut inississinnaasoq aamma erseqqissaatigaa. Tamanna pillugu ammit Canadameersut puisit qanoq pisarineqarsimanerannik oqaluttuartunik ilisarnaateqarnissaat pingaaruteqartoq Palle Christiansen oqarpoq.